CC24Març#27 – Sustul

#27 – Sustul

La nestre storie e scomence cuant che Iside, indenant di brut cu la gravidance, si jere rimpinade sul cjariesâr di Selmo, si jere sintude mâl, tant di scugnî parturî, tal mieç dal fueam e dai ramaçs.
Cussì al jere nassût Sustul, frut legri, pacjific e cuntun cerviel cence pretesis. Di cheste canaie si visaran pôcs, ma di sigure e ven memoreade la sô strambarie: nol poiave par tiere. Si, propit! Forsit che strane nassite e veve zuiât un brut scherç. Fat al stâ che il piçul al stave sù, par aiar, come sospindût.
Iside, crodint che e fos une magagne che e sarès lade vie cu la cressite, no si jere cetant lambicade. E tant di mancul no si jere turbade cuant che, rivâts i trê agns dal frut, ancjemò nol veve tocjât il paviment.
— Al è fat cussì. — E diseve a chei dal curtîl.
La robe e veve i siei vantaçs: il fantacin nol fruiave scarpis, al passave sore lis urtiis, e nol faseve mai cunfusion sul breâr de cjamare, cuant che al leve a durmî. A proposit di durmî: ce frêt te schene vie pal Invier, stant che no poiant sul stramaç al sintive passâ une biele curint di aiar, de cadope fin te cudule!
In curt di Sustul si jere ocupade ancje la television. Par fin bêçs a jerin stâts prometûts a cui che al cjatave une soluzion. Si passave dal provâ a tirâlu jù cuntune cidule contrarie, fintremai a chê plui semplice di jemplâ lis sachetis di claps. In ducj i câs Sustul al tocjave tiere par un moment, ma subite dopo velu di gnûf par aiar.
Dome Iside e jere contente.  — Mi va tant ben di bussâlu cence pleâmi, o pûr cjapâlu a bracecuel cence sintî cricâ la schene cumò che o soi vecje. Al è fat cussì!
Muarte Iside, dopo un an ancje Sustul al veve fate la stesse fin, cualchidun al dîs par sclopecûr.
No jerin nancje rivâts a sepulîlu. La casse no stave te buse, nancje dopo ve butât par sore dôs cariolis di tiere. Anzit. Di bot e jere tornade sù e svualade vie, tal cîl, lontan, fintremai che nissun la veve viodude plui.
E cussì e je finide la storie di Sustul, un om nassût par stâ par aiar.

di Massim Furlan (Brene Sfolmenade)
#1594

1 comment