La Stagjon des Contis e cjamine… fin a Cjamin!

No vin fat nancje la croniche de serade di Vinars a Codroip – ma us rive in curt – che za us rive cheste gnove. E ce gnove! Il nestri spetacul sul libri de CorseCurte22, La Stagjon des Contis, al va nuiemancul che inte rassegne leterarie “DIVAGAZIONi” e come simpri, aromai lu savês, no nus plâs fâ lis classichis presentazions e o fasarìn… UN SPETACUL.

Un spetacul cu lis contis dal libri, forsit, e ancje cu lis OnteCurtutis, lis contis di un autôr misteriôs, amì dal Peteçon Alessio Ecoret, che ti restin intor tant che une magle di vueli. Chei che a van daûr al account Instagram di Contecurte lu san ben… stant che o vin publicadis une ventine, ma ancjetantis o vin tal camarin.

Ma vonde cjacaris: SABIDE AI 6 DI AVRÎL al vignarà biel timp, e sot il clip, li dal Auditorium di Cjamin al Tiliment,  aes 11.00 di matine, juste juste in orari par spietâ l’aperitîf, us presentarìn La Stagjon des Contis. No savìn ancjemò cui che al sarà de partide, ma dal sigûr l’Ostîr e la Sartore. (Ma o confidin sul Famei e sul Muini, che no bandonin mai).

Benon… Vonde cjacaris che ca di cinc minûts us rive la mail dal lunis e o vin voie che cheste e sedi la prime gnove che o leieis.

Si viodìn ancje a Cjamin!

2 comments