ScueleCurte_Storie11: La semence dai dius

La semence dai dius

Za di un pieç si varès di vê capît che la storie no je une liste di datis che a ricuardin i acjadiments che a àn vût di protagoniscj i potents dal mont, ma une dissipline che e studie il passât dal om in dute la sô complessitât. Si capìs alore la impuartance che a àn inta chest procès i aspiets sociâi e culturâi là che si à di cjapâ dentri ancje lis religjons.

Cundut che in dì di vuê la societât furlane e je une vore laicizade, dilunc vie de storie de nestre tiere lis religjons – e massime il cristianisim – a àn vût un pês pardabon impuartant. Nol covente ricuardâ che la identitât dai furlans e je leade ancje aes specificitâts dal cristianisim aquileiês e ae storie politiche, ma ancje spirituâl, dal patriarcjât che al è nassût a Aquilee daûr di un model tipic des glesiis orientâls. Usancis, elements e peraulis che a rivin drets de religjon cristiane a son jentrâts a planc a planc inte vite di ogni dì e a son deventâts alc di naturâl, ancje di là dal valôr culturâl che a vevin sul imprin. Pensìn a trop che al mudarès il paisaç visîf dal Friûl se o vessin di gjavâ vie glesiis, gleseutis, anconis o fintremai pituris devozionâls. O pûr provìn a viodi tropis che a son lis peraulis o lis espressions de lenghe furlane che a divegnin de liturgjie cristiane (di “sacrabolt” a “eceomo”, di “vignî adoremus” a “puartâ la crôs”) o a trops che a son i nons di borcs e paîs furlans che a son nomenâts daûr di sants de tradizion cristiane.

Chel istès, ancje se par cuasi doi miârs di agns il cristianisim al à fat part de nestre storie, lis comunitâts che a àn vivût inta chest slambri di tiere che o clamìn Friûl a àn praticât ancje altris religjons e a àn venerât altris dius. Al è il câs di chei dal pantheon di Rome antighe che, rivâts in compagnie dai legjonaris romans intal secul II prime de nestre ete, a àn cjatâ bonstâ par cualchi secul ancje te nestre tiere. Cristianisim a part, a son propite lôr che, tra rescj di templis, monuments funeraris, iscrizions, statuis e statuutis, a àn lassât in Friûl plui testemoneancis dal lôr passaç. Pôc o nuie, almancul sul plan des fonts storichis diretis, nus vanze invezit dai cults e dai dius des popolazions slavis e langobardis che si son insedadis achì tra i secui VI e VII de nestre ete. Nol è di dubitâ però che ancje chenti si vedin jevadis preieris par Kresnik (che si tint a identificâ cun Perun, il diu principâl dai popui slâfs antîcs) o par Godan (cognossût tra altris popolazions gjermanichis tant che Wotan o Óðinn). Magari cussì no, ancje cuant che o vin cualchi repert che si pues assegnâ ae aree cultuâl, no sin in stât di cognossi ce dius o ce spirts che a veneravin lis popolazions che a àn fat sù i cjistielîrs o chês che a àn vivût intai sîts preistorics scuvierts ator pal Friûl.

O vin però ancje un diu che di lui o savìn che di chestis bandis al è stât cetant venerât, ven a dî Belen. O cjatìn testemoneancis de adorazion di chest diu dal pantheon celtic in diviersis areis de Europe, di chê centrâl (antîc Noricum) aes isulis britanichis, passant pe Aquitanie e pe Galie transalpine. Al è ancje cui che al calcole che al vedi lidrîs inmò plui antighis, leadis aes religjons preceltichis. Daûr dal numar di iscrizions cjatadis si stime che il centri principâl dal so cult al fos propit a Aquilee là che il ricuart dal so templi al è restât intal toponim Beligne. Di lui a son plui lis robis che no savìn che no chês che o cognossìn, chel istès si stime che al fos leât ae lûs, al fûc e al soreli (al è par chel che i romans lu associavin a Apol), ma ancje aes aghis, massime chês curativis. No si à però di pensâ che al fos dome un diu di pâs e cure, se e je vere che lis cronichis a disin che tal 238 de nestre ete al combatè al flanc dai aquileiês assediâts dal imperadôr Massimin di Tracie e ur regalà la vitorie.

La sô memorie e je stade recuperade in Friûl a partî dai agns ’70 dal secul stât. Lu cjatìn riclamât, par fâ juste cualchi esempli, te opare poetiche di Danilo Stampetta (Otmar Mainardis), in cjançons (come chês dai FLK) e in fumuts (Tarvòs di Sandri di Suald). La sô figure stilizade e je stade cjapade di simbul dal moviment culturâl Usmis e, subite dopo, ancje di Radio Onde Furlane. La semence di chest diu e je tornade a butâ, par rivendicâ – dal sigûr in mût idealizât, ma no par chel cence fondis – la idee di un Friûl cussient, diviers e libar.

1 comment