Bundì. Scrit super, di sparniçâlu ator a pitinton. Graciis e ogni ben!
ScueleCurte_Furlan11: DDT
Prin e dopo Donald dal Tiliment
Par cheste tierce lezion di leterature furlane “vive” o ai decidût di gambiâ metodi, anzit di savoltâlu. E alore, invezit di un pistolot academic come chel su Il cjâf dai furlans e il so autôr Franc Fari dal mês passat, cheste volte no us propòn nuie di lei ma dôs robis di scoltâ su Donald dal Tiliment, il romanç di Stiefin Morat, publicât tal 2020 dal Circul Il Cantîr di Mortean e di Radio Onde Furlane dentri de golaine editoriâl Cormôr Salvadi.
Par cui che al à vivût la clime culturâl che e jere in Friûl intai agns ‘90 e ‘00 chest romanç al è un cult, l’On the Road no dome dai doi protagoniscj Saco e Pidins ma di une gjenerazion che fra Usmis, Centri Sociâl, Radio Onde Furlane, Festintenda, Cormôr Salvadi, Mitili FLK, Arbe Garbe, DLH Posse, Musiche Furlane Fuarte, La Comugne e tantis altris situazions e à dade une scjassade fuarte come une teremot a une culture furlane che e jere avonde indurmidide e buine dome di cjalâsi indaûr.
Par chest, come che al dîs il titul di cheste lezion, te leterature furlane al esist un prin e un dopo Donald dal Tiliment, sedi pe storie e pai contignûts fûr dal vade dal romanç, sedi pe forme sperimentâl e pe lenghe pirotecniche screade di Morat. In cheste trasmission di Onde Furlane, de serie Mestris e soremestris, Sandri Carrozzo e Margherita Cogoi a discorin in maniere aprofondide dai aspiets leterariis inovatîfs dal romanç, inframieç di leturis fatis dal autôr stès.
Dopo la publicazion in maniere indipendente e cence une distribuzion uficiâl il libri al à continuât a zirâ sot tiere, come i farcs, e a alimentâ l’imagjinazion di altris artiscj come tai doi adataments teatrâls Donald D.T. di Teatro Sosta Urbana, pe regjie di Andrea Collavino e te serie radiofoniche in 30 puntadis, pe regjie di Renato Rinaldi, che us propòn di scoltâ il prin episodi (ma che, se ûs plâs, o podeis lâ indenant a scoltâ fin insom).
Lis dôs trasmission us cjaparàn in dut uns trê cuarts d’ore di timp, juste come une lezion a scuele. O soi sigûr che si divertireis e che us stiçaran a scrivi dai compits fûr cu la gamele.
Buine scolte.
BIOBIBLIO di Stiefin Morat
Stiefin Morat al è nassût a Morsan dal Tiliment, tal 1964, e al vîf a Udin. Al à fat part dal grup di poesie “Majakovskji” e dai moviments “Usmis” e “Trastolons”. Al è l’autôr di Donald dal Tiliment (2001), un romanç par furlan, inovatîf tai contignûts e sperimentâl te lenghe, che al è stât realizât ancje come serie radiofoniche (2007) di Renato Rinaldi e teatrâl (2018) di TSU – Teatro Sosta Urbana, pe regjie di Andrea Collavino. Simpri in prose al à publicât il romanç distopic Kebar Krossè (2016), realizât in forme di leture teatrâl di Massimo Somaglino e, par talian, il romanç fantasientific A zero g (2022).
Cun Giorgio Cantoni al à realizât il film Mugulis. I ultins piratis dal Tiliment (2006), premiât a la Mostre dal Cine Furlan di Udin.
In poesie, al à publicât cui Trastolons Tons Trastolons. Poets cence leç par une lenghe caraibiche (1998) e l’audiolibri Tananai (2001), la plaquette Le linee di Nazca (2015) e lis racuelte Isulis (2009) e Conseis par viaçs interstelârs (2025).
I siei tescj a son stâts musicâts di Zuf de Zur, Kosovni Odpadki, Arbe Garbe, Inzirli, Trio Bestie, Mauro Punteri e Bande Tzingare.
Materie: Furlan
Mês: Novembar
Prof. P. K.
Dutis lis contis
Lasse une rispueste