Lets in Osterie: 1976 – Il taramot dal Friûl

1976 – Il taramot dal Friûl
Paolo Cossi
SFF – WCOMIX, 2026
CE LIBRI ISAL?
Un fumut, o ben, un graphic novel che al conte l’event dal Mai 1976 a Forgjarie, mostrant storiis di int normâl propite inte sere dal sismi, cundut ce che al è sucedût dulintor. Cun riferiments mitologjics, memorie storiche e diferentis sieltis grafichis e di tecniche si mostre la frature dal 1976 te storie dal Friûl.

MA CE ISAL DENTRI, DI PRECÎS?
Une sorte di “collage” di storiis umanis ambientadis a Forgjarie che a vegnin sdrumadis dal “Orcolat”, che al cambie dal dut il lôr cors, cussì tant che il cors dal vivi furlan. Cuntune introduzion che e insuaze il taramot tant che flabe mitologjiche, si cjatin taulis a colôrs o in blanc e neri, cuntun stîl che al va daûr dai fats e che, a nivel grafic, al dopre tecnichis diferentis, passant des chinis, ae grafiche digjitâl aes litografiis. La storie e je inte sô prime version par furlan, ma ancje se sute di peraulis e je vivarose di segn e di imagjins.

MA CUI ISAL L’AUTôR?
Paolo Cossi al è innomenât autôr di fumuts che al à za dissegnât pe SFF la graphic novel par fruts Ti conti il vaiont. e che al à bielzà contât une vore di storiis (e disgraciis) doprant il medium dal fumut. Al à vût une vore di ricognossiments e al à vût voltâts i siei lavôrs in cetantis lenghis.

A CUI I PUEDIAL PLASÊ?
A cui che al à passion pai graphic novel, soredut chei plui dramatics, che a vierzin visions su fats storics ma lu fasin cuntune voglade origjinâl, contant la realtât ma di bande dai protagoniscj umans de storie. A cui che al à voie di viodi un cantin de storie dal 1976 cjalât di dentri e cence tante retoriche. A cui che al presee une tecniche dal fumut moderne e sclete, une vore istintive, pûrpûr resonade e paronade a nivel di stîl.

E SE O AI VOIE DI CJOILU?
Pe version furlane la robe plui facile e je lâ li de SFF, dulà che cjatais la vore. Ma si pues cjapâ contats ancje cun WComix, di Pordenon, che a son editôrs de opare.