CC26Otubar#03 – Il cjâf

#03 – Il cjâf

Ma i furlans àno un cjâf? O disarès di sì. Almancul cumò, in dì di vuê, o soi sigûr di sì. Se mi capite di lâ ator pal Friûl, o viôt cjâfs di furlans plantâts su lis spalis dai furlans. E duncje i furlans àn un cjâf, chest al è sigûr. Però no simpri lu àn vût. A son stâts agns che no lu vevin, propi no lu vevin. Parcè che no volevin vêlu, che ben si intint. I furlans a son smafars e, in chei agns li, valadì sul finî dal mîl e sietcent, a jerin vignûts a savê che i francês a vevin inventade une robe che e ur taiave il cjâf a la int. Cuissà mai che no ur vegni voie a chei matucei di là des Alps, di butâsi a impestâ ancje il Friûl! E che no ur vegni la sbisie di doprâ ancje chenti chel lôr imprest maledet! Cuissà mai. Miôr cjapâsi in timp! Mi capìs ben me jo!
E alore ducj i furlans veju che a van ator cence cjâf!
– Ven ca che ti tai il cjâf!
– No lu ai. O soi cence cjâf, no viodistu?
– Balis! Cui ti crodie?! Dai, distrighìnle!
– No si pues ghigliotinâ un che nol à il cjâf!
– Ancje cheste e je vere, ma tu il cjâf tu lu âs, sedinò ce maniere fâstu a mangjâ, a ridi, a fevelâ, a viodimi me? A contâmi lis sflandocjis che tu mi contis?
– Ti dîs che no lu ai, vuelistu capîle?
Dome cussì a son rivâts adore a gjavâsile!
Però, ancje cuant che il pericul al jere passât, a àn tirât dilunc inta cheste naine: nuie cjâf, nuie ghigliotine.
Al à coventât un libri, jessût intal an doimîl e po, in seconde edizion, in tal doi mîl e cuatri, par tornâ a meti un cjâf sul cjâf dai furlans. E no un cjâf cualsisedi, no po! Un cjâf il miôr dal mont!
Lei il libri par crodi!

Materie: Furlan
di…
#1936