CC26Otubar#02 – Infinîts

#02 – Infinîts

No sai, par furlan forsit si podarès clamâle FaLePo – che al sune un pôc tant che “falope”, ma pardabon al è dut altri. E sarès la “Farie di Leterature Potenziâl”, intal origjinâl francês “OuLiPo”. Al jere di agns che Mario mi stiçave, e jo o resistevi inte mê biade ignorance. Ma une dì, no sai ni cemût ni parcè, mi à colât intal grim (lu fasin simpri, cuant che a son sigûrs che nô o sedin pronts) un libri, metût adun propit dal iniziadôr dal Oulipo, Raymond Queneau. Ven a stai un libri di dîs pagjinis… che nissun al mont al rivarà mai a lei in dute la sô vite! In sumis, dîs sonets che si puedin cumbinâ in ogni rie, tant di gjavâ fûr cent mîl miliarts di poesiis diferentis. A zontâ doi calcui, metint un minût par lei le poesie e voltâ lis strissulutis par fâ su chê gnove, e vie cussì par dut il dî, e coventaressin pôc mancul di dusinte milions di agns. Homo sapiens al è su cheste tiere di tresinte mîl agns… Par lei Queneau, par me si scugne meti in taule l’infinît. E invezit: “Un numar, tant grant che al sei dificil di pensâ, nol à nie a ce fâ cul infinît”. Cjape mo. Pôc dopo, mi cole intal grim “L’Hotel de Sens”, altris doi francês dal stes trop (e no volevistu?). Une conte grise: al è Friedrich Nietzsche che al cîr la sô Lou Salome, puartade vie di Al Capone e scuindude intal hotel nuie di mancul che di Moriarty; e la cjatarà l’ispetôr Dupin leint pe bande juste (ven a stâi: par ledrôs) un orloi ben stramp. E mi à vignude intal cjâf le storie dal hotel di Hilbert, cuntun numar infinît di stanziis simpri plenis, ma che se al rive un gnûf ospit al cjatarà simpri puest. E, ancjemò, “Finzioni” di Borges mi si è viert ae pagjine de “Biblioteca di Babele”: il puest là che a son conservâts ducj i libris dal mont – chei za scrits, chei ancjemò di scrivi e ancje chei che nissun mai al scrivarà.
Infinîts di ogni bande, dut ator; e nancje ducj compagns. E biel che us conti, o cîr di rivâ ae mê destinazion. Dulà soio cumò? “Via Moebius”. Strani, mi pâr che di ca o soi za passât…

Materie: Matematiche
di…
#1935