CC26Setembar#30 – Il tramai

#30 – Il tramai

Alex al veve vot agns e une famee che e cjalave simpri par in jù.
Sô mari e so pari, a cene, a tignivin simpri il celulâr dongje dal plat. Sô sûr, chê grande, Vanessa, che e veve cuindis agns, il celulâr lu veve simpri in man e no tirave sù i voi nancje se tu le clamavis par non.
Dome Lidia, la piçule di sîs agns, e cjalave ancjemò la int in muse.
In cjase di Alex si fevelave soredut par talian, dome ogni tant si diseve cualchi peraule par furlan, ca e là.
A Alex, però, il furlan i plaseve une vore. Lu veve imparât un pôc là che lis peraulis a san ancjemò di tiere, di aiar, di soreli e di ploie: in campagne, li di nono Vigji.
La sabide, lui e Lidia a lavin simpri li di lôr nono (che, po, in realtât, al jere il lôr nono bis), par vie che di sabide no vevin scuele e i gjenitôrs a jerin a vore. Cuant che a lavin a cjase dal nono, i davin une man tal ort e cu lis gjalinis. E il nono, content come une pasche di vêju cun se, ur contave tantis storiis: chês di cuant che il frut al jere lui, chês di cuant che al jere zovin e chês che al veve let tai tancj libris che al veve te sô grande biblioteche.
Il nono al fevelave dome par furlan e cussì Alex e Lidia, cul stâ cun lui, a vevin imparât ancje lôr un pôc di furlan.
Ogni tant, Vanessa e lave ancje jê li di lôr nono. Dome che, di solit, si sentave fûr de puarte di cjase, simpri cul telefon in man, e il nono, cuant che al passave dongje di jê, al ripeteve simpri:
– Met mo jù chel tramai, frute, che tu ti incocalissis e vonde!
Alex al pensave che “tramai” al fos une peraule furlane par dî telefon. Po, une dì, a scuele, la mestre di furlan e veve dit che la peraule furlane par dî “telefon” e jere…“telefon”.
Alex, li par li, al jere restât, ma po al veve alçât la man e al veve domandât:
– Ma telefon, par furlan, no si disial ancje tramai?
In chel, però, la lezion e jere finide e la mestre i veve prometût di rispuindi te volte dopo.
La mestre e veve mantignût la peraule e la setemane dopo i veve mostrât une figure: une piçule scjaipule di len, cuntun sportelut e dentri un toc di formadi.
– Chest al è un tramai – e veve dit – al è un piçul argagn che si dopre par cjapâ lis surîs. Viodistu, la besteute e jentre dentri par gole di mangjâ il formadi, il sportelut si siere, e jê no rive plui a saltâ fûr.
Alex, li par li, al jere restât un pôc mâl: pussibil mai che il nono nol savès ce che al jere un tramai?
Po, te sere, a cjase, al veve cjalât la sô famee.
Il pari, sentât dongje di lui, al rispuindeve aes mails; la mari, di chê altre bande de taule, e faseve cori lis fotos cul dêt; Vanessa, pleade sul telefon, anzi, glotude dal telefon, e jere come sierade intune scjaipule, cul sportelut sierât daûr di jê.
E alore al veve capît: il nono nol diseve “tramai” par dî “telefon”, ma al clamave il telefon “tramai” par dî ce che che al pensave!
– Vanessa, tu sês come une surîs.
La vôs di Alex e veve come taiât in doi il cidin de sale.
Vanessa, alçant i voi, e veve tacât a berlâ:
– Ma cosa dici??!! Ma sei scemo??!! Scemo!!
Ancje i gjenitôrs, nasant un principi di barufe, a vevin alçât i voi dal telefon e cumò ju cjalavin di brut.
– Ma sì, ti dîs, il formadi al è dentri dal telefon. E tu tu sês dentri dal tramai – Al disè Alex.
Vanessa e cjalà il fradi, po il telefon, po ancjemò il fradi. E spalancâ la bocje, come par rispuindi, ma no rivâ a dî nuie.
I gjenitôrs, cjalant i fîs, a tasevin ancje lôr, cence savê ce dî.

Materie: Tecnologjie
di…
#1932