CC26Setembar#28 – Animâi dumiestis

#28 – Animâi dumiestis

Che pensistu cuant che ti disin: Nomene un animâl dumiesti?
Di sigûr tu tu pensis a un cjan, une cjice, a un cunin, un poleç, a un purcit, o salacor, a une copasse!
Se jo oves di  partecipâ a un concors di  raritâts… o soi sigûr di cjapâ il prin premi.
Ti disarai cualis che a son par me cuntune storiute.
Cuant che il cjalt di Istât al bruse o ben, il delicât e lizêr soreli di Autun ti involuce, bielis criaturis a svolin ator ator dal gno zardin.
Chestis a fasin une vore gradevul il zardin e a balin ben sot dal soreli jenfri il mâr di rosis coloradis.
Chest an o ai cjatât “i miei animâi dumiestis”: a son lis paveis monarcje… o miôr, lis ruiis des paveis!
Il non sientific “Danaus plexippus” al ven dal grêc; la traduzion leterâl e à une cierte cualitât poetiche,  e vûl dî: metamorfosi indurmidide, sonolente, insumiade, letargjiche… a son dutis peraulis dai monts che no son ordinaris, parcè cheste capacitât di mudâ aspiet di ruie a pavee e je une robe une vore maraveose, une vore dal grant creador dal Univiers!
O abadi chestis creaturis di cuant che a son piçulis come i ûfs cuasi invisibii, daspò ruiis interesants a riis, fintremai che a deventin splendidis paveis.
O ai jemplât il zardin di plantis di “asclepsias”  nominadis ancjemò “bandiere spagnule”; che a son la mangjative che a àn miôr.
Cualchi volte o ju cuvierzi cun plastiche par proteziju dai uciei che ju mangjin cun bon apetit.
Al è un istant une vore tenar cuant che a lassin la crisalide o pûr il cocon, e a spietin vulnerabilis che lis lôr alis si secjin e a scomencin a batisi.
Mi plâs une vore cuant che a svolin dulintor biel fasint un bal plen di zirevoltis! Al è un spetacûl splendit!
O pensi ancje che mi stan salutant dal cîl… Aio segnâi di matetât, no po?
Cumò… la storiute e je za finide.
Sì che duncje, letôr, che pensistu?… Varessio di otignî il premi?

Materie: Siencis
di…
#1930