CC26Setembar#25 – Inte vuate

#25 – Inte vuate

La ombrene dal ristiel si deforme intune muse scalembre dai dincj spiçots. Lis çatutis si poin lizeris parsore de sdrasse di polvar tra i imprescj e lis robis dismenteadis. Il puest al somee vê dentri ducj i catans di chest mont, fûr ce che lui al cîr. Purpûr, il sgrisul des mostacjis al tradìs la presince di une piste di prime cualitât. Il music si ferme juste a un tîr de gruesse sorprese, poiade tal mieç di une curnîs indorade. La sclese i cimie tant che un spic di lune biel che il bruntulâ de panze si slargje a ricuardâi il so vueit. Al è alc di strani, ta chel toc di formadi che lu spie tai voi. Alc che nol rive a spiegâsi… come di un cîl suturni prin de bissebove. Ma chel rivoc tai budiei nol mole di tormentâlu…
La gnot si slungje tra lis palacinis e lis stradis secondariis. Lis gjambis scridelidis di Tommy si movin malcuietis ta chel gatul di scovacis e gjats rognôs. Se sô mari e fos li, e varès za tacât a tulugnâ su la maleducazion de int coiare e disgraciade. So pari invezit… ben, se chel ogni tant al ves tasût, probabil che lui no si sarès cjatât alì. Il zovin al torne indaûr ai barufons in famee e a dutis lis voltis che al è scjampât vie di cjase. A sô sûr che lu tignive platât, a sô gnece Alice che e vignive a cirî la strente dai siei braçs… fin che lui no si è pierdût in altris bracecuei.  Une tarlupade i travane il cerviel. La sesule de lune si distude insom di une androne torgule. Il cûr de citât al somee tucâ lontan, intant che il fantat si scrufuie cuintri dal cuadri di une puarte sierade che e pâr dividilu dai siei siums pierdûts.
La bocje de gnot si siere parsore di lui. La curnîs indorade dal tramai si mude intune scjaipule. Par un marilamp, il temporâl si discjadene in ogni part dal so cuarp. Il dint de lune si inficje dentri de anime. Al slambre piel, cjâr, vues. Po dopo, il cidinôr scûr al torne a vierzisi dentri di un pâr di pipinis discocoladis.

Materie: Tecnologjie
di…
#1927

1 comment