CC26Setembar#23 – Il bredul

#23 – Il bredul

Al jere une volte… – «Un re!», a disaran i nestris letôrs.
Po sì po. E invezit al jere un toc di len. Ma no un len di gale, al jere un len di tasse, di chei che di Invier si doprin intes stuis e tai caminets par impiâ il fûc e scjaldâ lis stanziis.
Ma si sa che nô furlans no sin bogns di straçâ. Bati i dincj, pluitost, ma no straçâ. Si che, al pensave, al varès rivât scuasi di sigûr a gjavâ fûr chel che i coventave.
De cantine al cjolè: maçûl, par petâ biei colps; scarpel, par gjavâ lis scjelis di masse; segaç e manarin, pai tocs plui grues; splane, limbel e soreman, par slissâ ben ben; sguibiis, par intaiâ lis formis justis; furducjis, che intune buse lae vît si pare dentri miôr; e cualchi raspe, che no si sa mai.
E, par no contradîsi, nol pià il fûc: si varès scjaldât lavorant.
Al veve ben cjapât un bon snait. Cul prin toc sclapât al rivà a tirâ fûr un bredul a trê pîts, e i fasè ancje une schene par poiâsi: si veve pardabon di stâ comuts. Al mateà un pôc di menevîts e cole par che al stes dongje, ma insume al vignì fûr propit un biel lavôr. Al jere sodisfat.
Al mancjave l’ultin toc, l’impres tplui impuartant. Fondamentâl. Lu curà un grum: al veve di jessi perfet. Al splanà cun cure la part parsore, par fâle deventâ biele taronde. E cul scarpel al spiçà la ponte – une siore ponte, tant che al someave propit un spêt. Se nol fos che al jere di len, al varès fintremai slusignât.
Finît juste in timp. Cumò e jere ore di preparâ dut, par ben. Dut perfet. Cuntun pocjis di sfueis e cualchi ramaçut ristielât di fûr al pià il fûc inte stue. La sô femine e jentrà cu lis sportis de spese, plenis come simpri, ogni tant masse. Ma e faseve ben di mangjâ. Jê si cjalà ator, stranide de novitât.
«Schatz, sentiti, provilu.» Jê lu cjapà in peraule e si sistemà sul bredul. «Âstu provât a poiâ le schene, ce ben che si stâ?» – In efiets, cjalant la muse di jê, al veve di jessi propit comut. Lui, ancjemò cul maçûl in man, al cjapà il spêt e jal plantà intal mieç dal cûr. Il bredul nol provâ nancje a ribaltâsi. Lu veve costruît propit ben.

Materie: Tecnologjie
di—
#1925

1 comment