CC26Setembar#21 – Polvar e cinise

#21 –  Polvar e cinise

Il glaçâr dal Montasio nol è plui. A reste dome un non su mapis vieris, chês di cjarte che nissun al stampe plui. A Siele Nevee, Marte e controle i panei solârs incrostâts di polvarine zale, la stesse che ogni Istât e si alce de planure e e rive su lis Alps Julis come une seconde piel.

La Val Racolane in dut e conte vincjetrê abitants, ducj di passe sessante agns stant che di zovins, di Mueç in sù, and’ è restâts ben pôcs. Par cirî lavôr a son lâts a cueisi jù pe plane, o par bramâ un alc di fresc, a nord viers de Austrie, dulà che al plûf ancjemò cualchi gote, massime in Primevere.

Par chei di Siele e chei che ancjemò a lavorin sui plans, dut il timp dal an, la aghe e rive in te cisterne comunâl a dîs alternâts, razionade seont un algoritmi regjonâl che nissun nol à mai capît daûr ce logjiche che al resone, ma che dutcâs al si tire daûr un plen di blestemis.

Marte e cjale la Mont Forade e si ricuarde di so nono che al contave des neveadis di Novembar e dai riui che a scrossavin a jugn cul disgiel. Il vert cumò al è deventât naranç, l’aiar al è dal cjalt ancje parsone dai mil metris e dai boscs di peçs, se no son brusâts, a restin tassis di len muart roseât dal bostrico.

Il dron de Protezion Civîl al passe par censî cui che al è restât, a lassâ pastiliis di jodi e mascarutis di doprâ tai incendis. L’ultin, sore Puntebe, al à brusât par setemanis prime che lis plois di Otubar – lis unichis dal an –  ju distudassin. E cheste e je la strategje de gjestion dai fûcs pai sorestants: spietâ la plooie.

Marte e pense ancjemò une volte se nol sarès il câs che ancje jê e ledi a stâ di une altre bande. Ma la sere, cuant che il soreli al cale e il silenzi al ven rot das piuladis des ultimis marmotis, i pâr di tornâ a sintî ancjemò la vôs di so nono e di chei che cun lui a passonâvin lis vacjis sui plans, di trop che lôr al jerin part vive di chê mont e di chel mont.

E alore al à ancjemò sens restâ e continuâ a scombati par che alc al cambi, ancje a cost di smamî tal aiar, tant che polvar e cinise.

Materie: Siencis
di…
#1923