CC26Setembar#17 – La sapience dal mus

#17 – La sapience dal mus

“Lis stafis a coventin par poiâ i pîts, sostignî l’ecuilibri e controlâ miôr la siele”.
Sì, sì, tu mi mostravis il telefonut che al dîs chel, ma jo no cumbinavi di lassâ fer un moment il pît su un di chei che dibot si jevave fûr chel altri, e il cûl al sbrissave de siele di une bande a di chê altre.
In chel timp nol jere ni video esplicatîf, ni tutoriâl ni wikiostie.
O jeri ator dai 38 agns cuant che un amì mi dîs: “Al è un biel viaç di fâ parsore de citât di Salta. A son trê dîs jenfri valadis e bielis culinis e si rive a lis ruvinis di un paisut fondât dai Incas. Coste pôc, lu inmanee un gno amì. Ma si scuen rivâ a cjaval”.
A Buenos Aires i unics cjavai che o cognossevi a jerin chei par television. Alore o soi lât là di un professôr. Un di chei che ti scuelin par savê costruê in veretât un vincul cul nemâl tant che mieç di traspuart, no par fâ figurutis e saltâ centis.
Ma cun lis stafis nuie ce fâ. I pîts mai si comedavin, a saltavin fûr tal miôr moment da la cjavalgjade, tant par pensâ “chest no lu inmanei plui”. Cuant che o jeri par molâ l’istrutôr mi dîs: “fasìn une ultime prove, e se nol funzione tu âs reson di lassâ pierdi. A son pôcs câs di int che a va miôr cence lis stafis e cence siele, ce che si dîs “montarenpelo”.
E crodimi. Al à funzionât. O ai cjapât dibot il gust. La comunicazion cul nemâl, la fiducie, il cognossiment mutuâl. Cjavalgjâ in velocitât, libar, nome cun lis brenis. Dut un mont gnûf.
Ma rivâts a Salta, a mi mi à tocjât un mus che al cognosseve a memorie chei trois di cjapâ tai monts. Jo o dovevi nome restâ sentât cence fâ nuie.
Tal ultin dì, e intune da lis ultimis croseris di trois o ai pensât che almancul une volte o volevi comandâ jo, e cul cjâf adalt, i voi tal orizont e la schene drete o ai tirât la brene par cjapâ il troi a man drete.
Il nemâl mi a cjalât fîs par un baticei e daspò al à cjapât il troi a man cjampe (che ae fin al jere chel just).
O soi sigûr che in chê voglade mi a dit: “Tu fâs il figo nome in planure, in mont o soi jo chel che al sa”.

Materie: Tecnologjie
di…
#1919