CC26Setembar#18 – Il masanedêts

#18 – Il masanedêts

Samantha, cussì si clamave. E jere une femine in cjar e cuntune espression severe che se tu te cjatavis par strade ti vignive voie di cambià di marcjepît. Ma ducj chei che le cognossevin a savevin che e jere dut il contrari di chel che e someave. Par dî la veretât e jere la persone plui imberdeade e insigure dal mont.
E veve cjatât di lavorâ te fabriche Süperwürst che e jere stade vierte di pôc dongje dal paîs. A jê i plaseve un grum mangjâ luianiis e e jere propite contente di podê lavorâ li. La uniche robe che no i plaseve di chel lavôr a jerin i grancj tramais che a jemplavin lis salis di sunsûr. Jê cun altris personis si incjariave di revisionâ i tocs di cjar che dopo a saressin stâs passâts te grande machine di masanâ. No saveve parcè ma e veve cjapât une antipatie speciâl par chel tramai, dulà che dut chel che al jentrave al vignive fûr fruçonât. I veve sgnacât il sorenon di “tramai masanedêts”.
Une dì intant che e lavorave e viodè che par tiere al jere dut sporc e e decidè di passâ un pôc la scove par netâ. Puare Samantha, no saveve che chê dì il diaul si jere sveât cuntune ande di birbant e i varès fat cualchi scherç dai siei. Intant che e netave intun moment di distrazion si inçopedà par daûr, e sbatint i braçs come un uciel par no colâ la scove e finì par sbrissâi des mans fasint un svol olimpic e colant propit dentri tal masanedêts. La scove e finì masanade insiemi cu la cjar, e Samantha terorizade e le a alarmà il diretôr dal repart.
Dopo di vê savût ce che al jere sucedût il diretôr i domandà:
-Di cè colôr jerie la scove?
Jê cence capì e rispuindè:
-Maron siôr Diretôr.
-Bon alore no vin di ce preocupâsi, nissun si visarà.
La muse di Samantha e jere deventade blancje dal orôr. Di che dì no e volè sintì plui a fevelà di mangjâ industriâl e i restà par simpri te memorie la imagjin di chel teribil tramai masanedêts.

Materie: Tecnologjie
di—
#1920