CC26Setembar#15 – Sintiments

#15 – Sintiments

I plaseve vogâ. I plaseve traisi tal flum. E dopo ogni tuf al tornave sù a rive par traisi ancjemò e ancjemò. Nol scoltave mai sô mari che i diseve di stâ atent e di no fâ monadis. I rispuindeve di sì, ma lui tal flum si traeve di stes.
Dut câs, al sucedè che une volte lis robis no larin come che lui al veve calcolât: a pene jentrât ta la aghe glaçade al provà une sorte di scosse, ma no il solit sgrisul che al jere usât. In curt nol viodè plui nuie e il frêt si tacà a sfantâ. Un pôc a la volte, al sintive intune maniere plui fuarte, plui intense. Tal puest dal frêt a partî dai pîts, lant sù, i vignì sù un cliput plasevul che lu faseve sta ben, come cuant che si cjape il soreli ta une biele zornade ventilade. I pîts ju sintì, in bande di cjalts, ancje salts come mai prime. Pontâts e sigûrs, i permetevin di spostâ il so pinsîr plui adalt. Cussì i dêts des mans i parerin che a fossin plui dal solit e propit tra chei dêts i parè di sintî il tintinulâ des fueis tal aiar. La piel le sintive plui dure e grispiose, come se e fos chê di un vecjo, ma comude miôr di cualsisei vistît. I cjavei ju percepive jevâts par adalt e oltri che l’aiar al sintive ancje il pês di tancj ucieluts diviers che i saltavin par parsore. Cun atenzion, a planc a planc al rivà a ricognossi i cjants di ducj cuancj: il zirlâ dai dordei, il cjantâ da lis gjais stelis, lis siviladis dai mierlis, il cuarnâ des çoris. Ancje i odôrs i parerin vê une essence plui intense e il fueam di ogni plante e veve il so parfum e ogni odôr al veve la sô rose, il so fonc, la sô bestie, la sô pome.
Cualchi dì plui tart al fo ricjatât il cuarp dal zovin. Al jere plui a val; plui sglonf e cuntun colôr tra il viole e il grîs, scuasit come un toc di marmul. Al fo ricjatât cui voi ancjemò vierts. “Puar zovin” al disè il socoridôr che lu veve tirât sù e i passà la man su la muse par sierâiju.
Ta chel l’arbul, bot e sclop, al fo inceât e po dopo al tacà a viodi il barlumâ dal glereâl li che si jere inlidrisât.

Materie: Furlan
di —
#1917