CC26Setembar#14 – Presonîr

#14 – Presonîr

«Diu… ce dì isal? Argh… la schene…soi dut indulît… trop timp isal passât? Ce mi restie ancjemò? Trop rivaraio a resisti? No mi visi la ultime volte che o ai viodût il cîl, ni il riflès da la mê muse. Cuissà ce aspiet che o ai. Forsit no sarès bon di cognossimi cun cheste barbe colôr cinise, facil che o somei al gno vecjo. Ah, il nono… la sô muse, soio bon di visâmale?
Aromai chest puest al è il gno sôl panorame: o cognòs ogni cjanton, ogni centimetri. Ancje cui voi sierâts o sarès bon di dissegnâlu su di un sfuei: i mobii di len, i vecjos trâfs che a san di umit, il tapêt plen di polvar e dutis chês lenghis coloradis che a colin jù dai mûrs che, ogni volte che o vierç i voi, mi visin che il sôl responsabil de mê presonie o soi jo… Il cricâ dal len al segne lis oris che a mi restin e lis talpis da lis surîs mi somein une melodie in chest cidin. O varès voie di vaî, ma no ai plui fuarcis ni lagrimis… Ce disevie la none? Ah sì: “Cjastron! Tu sês simpri il solit! Prin o dopo varin di taiâti lis mans!” Ah ah ah! Mi ven cuasi di ridi… se pardabon mi vessin taiât lis mans no sarès presonîr chi dentri. No mi è vanzât plui nancje il flât par preâ… o sint che o stoi par lâ fûr cul cjâf.
…Eh? …Ce isal? Chest rumôr… Pîts? … Pîts! Cualchidun! La mê uniche sperance! Judâimi! Soi ca! Judâ…»

Bang! La puarte si spalanche e e jemple la stanzie di lûs. Une figure sul ingrès. Svelte e ven dongje. Une vôs e tone tal cidinôr.

«Pieri! Cjastron! Tu sês simpri il solit! Prin o dopo o varin di taiâti lis mans! …cjale li! I glimuçs! Sâstu trop lavôr par fâju sù ducj? E tu ogni volte… Ma saraial mai pussibil? A sîs agns restâ incjastrât tal tramai?! Dîs gracie a tô sûr che mi à domandât di vignî a judâti. Ma viôt che timp o tart ti lassi ca sul cjast a fâ la mufe! Cjo… tu âs la man dute rosse, va metile sot de aghe frescje. Cjale ca i fîi… son ducj intorteâts! Mi tocje tornâ a fâ sù dut! Dopo tu lis cjapis! Cumò moviti, al è pront di gustâ!»
«Si, none, scuse…»
«Sù po, va indenant!»

Materie: Tecnologjie
di …
#1916