CC26Setembar#13 – Aquincum

#13 – Aquincum

O cor par rivâ a timp al Jolly Captain, un pub dentri di une barcje ancorade lì de rive de Danau. Ferenc mi spiete pal conciert dai teutonics BŁOODMÅRE.
Li de jentrade o lassi la gjachete a une fantate cuntune rose rosse tai cjavei e lavris dal stes colôr. Te lûs sporcje dal ambient, la piel de muse samee blancje par contrast cul neri dal ombret.
Te sale la band e à za tacât a esibîsi. Charun, il cjantant, al à intor un cjapielat scûr di incuisidôr e al dopre un pastorâl di vescul a ûs supuart pal microfon. Ferenc, za dongje dal palc, mi viôt e mi clame alçant la tace di whiskey sore dal cjâf.
La frute da la rose e je vignude dentri te sale. E cognòs ducj i tocs a memorie, si disgose. Jo i lei lis peraulis tai lavris e mi inecuarç, alore, che i dincj dal voli a son une vore spiçâts. I nestris informadôrs a vevin dit la veretât, duncje! Rivâts a la ultime cjançon, i fâs a Ferenc il segnâl ticant l’orloi: miezegnot e je rivade. Dopo pôcs seconts Charun al cjante cun enfasi: “And we open your veeeins”, slungjant la ultime note intant che la musiche si ferme. Ai musiciscj e a uns cuatri di lôr tal public i voi si impiin di lûs spetrâl tal scûr de sale.
Al sucêt dut tun lamp: o tiri fûr la pistole cjariade cun balis di arint, i trai a la fantate e le cjapi tal pet; i spetatôrs a tachin a sberlâ e a cori sbatint un cul altri. I altris vampîrs a balinin di ca e di là, cuntune agjilitât sorenaturâl, sghindant ducj i colps miei e di Ferenc: lotìn, ma no vin sperancis. Cun doi salts, Charun mi brinche e mi muart il cuel.
A colp, la disperazion e la soference a jemplin l’univiers. No viôt plui nuie, o sint dome gusielis di dolôr che mi travanin la cjar.

Pôcs soldâts a jerin restâts in pîts ma i androids a jerin ducj sdramassâts par tiere: intant che lôr a simulavin un atac par discjoliju, i pilots di drons a jerin rivâts a sdrumâ l’ultin data center che al tignive in pîts la machine.
I ribêi a vevin vinçude la vuere e dopo secui di opression la umanitât si jere tornade a cuistâ la libertât.

Dentri di techis plenis di liquor syntetic, i çurviei di Frank e di chei altris membris de Corporazion Mondiâl dai Plutocrats a jerin stâts mantignûts te ilusion di vê ancjemò un cuarp. Un sotprogram ibrit, biologjic e artificiâl insiemi, ju faseve viazâ di une fantasie a chê altre. Cumò che il sisteme al veve fermât di comunicâ e di nudrîju, la lôr cussience smavive, svelte, tun inzirli di insiums trements.

Materie: Furlan
di…
#1915