CC26Setembar#12 – No son plui lis stagjons di une volte

#12 – No son plui lis stagjons di une volte

Chel che al dîs che lis stagjons a son simpri compagnis, al è un coion.
Cuant che o soi nade jo, mi contave mê mari, tal mês di Dicembar di cuasi otante agns indaûr, al jere un frêt che a mi è vignût un polez tal nâs cualchi dì dopo. E je vere che lis cjasis di chê volte no jerin isoladis e scjaldadis come chês di vuê e cuant che e tirave la buere i telârs dai barcons dal curidôr a jerin in pratiche come tamês, ma i Unviers a jerin une vore frêts, si lave par tancj dîs sot zero.
L’Autun, come la Vierte, a duravin il just e no, sì e no dis dîs come cumò. Si vendemave in Otubar, po si lave a cjapâ sù la blave e ai Sants, su lis gjostris di Rivignan, si vevin musis rossis e peits glazâs. Prin di Nodâl a tacavin a glazasi ancje i fossâi, ma par nu fruts al jere biel sgliziâ dopodimisdì, senze compits di fâ, dome cuntun maion intor.
Al vigneve propit frêt. E al neveave ancje ca di nu te Basse, avonde di fâ il pipinot e di gjoldile cualchi dì.
Nostre agne nus scjaldave il jet cun la munie, mê mari e scjaldave il jet cui modons.
E cun dut chist a jerin mancul brunchitis e influenzis, almancul mi pâr a mi.
E lis Istâts? Tant miôr di cumò! Come chê di chist an po! Siarâts in cjase come cul COVID.
A mi fasin une vore dûl chei che a scugnin lâ a vore. Une volte il contadin al sudave la sô part, soredut a fâ il fen, ma, come che si diseve, a jerin chei cuindis dîs di scjafoaz dal mês di Avost, pal rest si faseve front. Cumò invezit ancje lis cabinis dai trators a àn l’aiar condizionât.
Tor vot di sere mê agne mi mandave a spalancâ lis cjamaris e cuant che a si lave a durmî, muscjins o no, si pontavin i scûrs e a si tignivin viarts i veris par fâ passâ un fîl di aiarin e si indurmidivisi cul cjant dai gris, che no jerin gnots tropicâls.
Cumò d’Unvier forsit a si sparagne sul riscjaldament, ma dopo, d’Istât e va sù ben la sissule par disfredâ.
Mi sa che cumò Tite Fote al à dome di vê pôre di murî di cjalt.

Materie: Siencis
di …
#1914