CC26Setembar#09 – Oh Diu

#09 – Oh Diu

“Oh diu diu ce cjalt… oh diu, ce frêt! No ‘nd è pâs nancje ca sù! Ma viôt po ce che mi cumbinin chei doi basoâi di fantats là jù” al disè Zeus.
Scuindûts, daûr dai nûi cuant che a fasin la sbrume, come tai cuadris dal Tiepul. Nûi plens di bocui tant che paruchis di Vignesie, orlâts di ciprie e la cotule celestine profumade di mâr. I doi dius si zuiavin a scacs lis stagjons, come fossin coculis!
“Ma no san ce che ju spiete” al zontà il pari insustât. Efest al clamâ a sè Boreâl, Bissebove, Burlaç, Rogant e Criùre e ju disponè sui claps di cjarbon neri di Pontebe. Par cuintri a Elios, prontât sul so cjâr lusint, i fasevin corone Apol, Belen rivât dal Nord, Ra dal Egjit, Amaterasu dal Gjapon e Tonaitju dal Messic, ben in schirie sui cuadris di marmul Ros di Verzegnis. Vie alore! Sburte, cole, salte, scjavace sofle, roche….Stal! Dut fer! Solite solfe, solit timp. Invier, Vierte, Istât, Sierade. Chel mataran di vecjo i petà alore une scosse al zûc. Al tirâ dongje doi “nins”e i fasè balâ la Samba pal creât! Code rosse e code blu come jeurs a forin spedîts, un a drete e une a çampe, come frecis tor ator dal emisferi a remenâ chel strac teatrin. Aghis, aiars, cîi e nâi a finirin in gjambadorie come fos carnevâl. Oh diu diu ce cjalt… oh diu, ce frêt! Tant che pipins, sul contorni de verde sfere, i oms no savevin plui ce fâ, l’ecuilibri al jere saltât ma a savevin che tancj di lôr ju vevin preâts:  “Se non vanze no ‘nd è vonde, la mê casse varionte, se cualchidun  lasse la piel, ingrassarà il gno budiel!” Chest il rosari di chei cul cjapiel. Oh diu diu ce cjalt…oh diu,ce frêt! Disè Marie tirant dongje i scûrs a pene che il zîr dai aiars di siroc e tramontane a finirin di businâ. Tra un ultin scriul e une cjalde bugade, une vôs, sole, e jentrâ tra lis fressuris  fasint l’inzirli tor di jê. “Cjastrons! a sô timps ûs vevi visâts: se ben no si volareis… vareis orelis e no sintareis, voi ma no viodareis, lenghis e no si capireis.” Marie sturnide, si inzenoglà. Po alçà i voi e e domandà cemût fâ.  Oh diu diu ce cjalt…oh diu, ce frêt! Sbalç di eco fin là sù tai spazis cence confin. Un segnâl?  Se al fos un berli nemâl? O un fastidi? Vôs cence interès, sperin che a finissi prest! Daûr il voli dal gno grant binocul o scrutini. Si môf il neri dal temporâl, si stâ riçant il mâr. Fulugne o fumate aromai e je fate, spietìn dome la date. Ma nissun si sinti rassegnât. Nie sclope, ma pale e cussience in man. Po sarâ magari un scherç o une ridade che nus salvarà. Cuant? Cuissà! Miôr stâ in vuaite!

Materie: Siencis
di…
#1911