CC26Setembar#04 – Quelli della mattina

#04 – Quelli della mattina

A jerin in cuatri simpri ogni matine tal bar di Pauli. Gno pari che al jere spes li, vint la nestre buteghe propit tacade e comunicant al bar, ju clamave «Quelli della mattina». Par ridi. Ta chê volte in TV al jere un program di sucès che si clamave «Quelli della notte».
I vecjuts a jerin doi che si clamavin Bepi (un al jere l’om de comari), un Vito e un Toni che al jere piavot e ex diretôr de filande. Vito al veve fat la vuere di Spagne cui fassiscj. Un dai doi Bepi, chel de comari, al jere stât vigjil urban. Chel altri Bepi no sai ce che al veve fat. O sai però che al organizave gjitis. Une dì al veve scrit un cartel e lu veve lassât li dal pancôr: al jere dut plen di strambolots; al veve scrit che ducj i partecipants a vevin di visâsi di puartâ cun se la «Carta d’Entità».
Tra un tai di blanc o di neri tantis a jerin lis cjacaris ma, stant che a jerin vecjos, il timp al jere spes l’argoment principâl. E ce cjalt che al è vuê e ce frêt che al vignarà chest Unvier e la tampieste e la tramontane e la codebuie e il montafin e il sec e l’umit e la criùre e il caligo, la glace, la bissebove, il rogant, la stravinte e…
E si pitufavin parcè che ognidun al voleve vê reson e al crodeve di savê plui di Bernacca, il famôs colonel meteorolic de TV. A messedavin talian strambolotât, furlan e piavot. Un spetacul!

An 2058.
Il bar al è simpri chel, l’ambient di P4UL1, ma des robis a son cambiadis. Sì, a son ancjemò  “Quelli della mattina” ma si trate di cyborgs. I doi B3P1, plui V1T0 e T0N1 a discutin cun animositât e vôs robotiche/sgrasaiote. B3P1 de C0M4R1 al mostre sul so display eletronic incorporât cemût che al sarà il timp in Eurasie: ben cinc ciclons a rivaran; un al tocjarà il FR1ÛL-V1GN3S13 JUL13 e si varà di là jù tal bunker sot dal bar. Bar dulà che a servissin ancjemò cualchi cafè e vin pai pôcs umans ma di norme a dan vueli di machine e supuart cibernetic ai cetancj robots e cyborgs.
C’est la vie!

Materie: Siencis
di…
#1906