CC26Setembar#03 – Monuments

#03 – Monuments

Ai 30 di Avost dal 1870, inte citadute francese di Raucourt, dongje di Sedan, a une femine i veve tocjât di fâ la lissie pe blancjarie dal Imperadôr Napoléon III, che al jere li par tignî di voli la vuere cuintri de Prussie. Nol stave ben, l’Imperadôr, al jere malât e, cundiplui, nol veve nancje plui il podê che al jere passât, di fat, intes mans de imperadore-rezidore.
Ma al voleve sedi li dongje dal so esercit che al jere in pesante dificoltât. E cundifat a 2 di
Setembar e fo la grande disfate. “A Sedan Napoléon céda ses dents”. Zûc di peraulis par dî che chel om, cussì potent fin îr, al à pierdût su dut, ancje i dincj. Une disfate spaventose.
Cheste femine, daspò di vê consegnade la sô lissie, e fâs sbrissâ il voli dentri inte cjamare di Sô Maestât. E lu viôt. Il so coment:
– Ça un empereur? En voilà une bête!
Che si pues tradusi:
– Chel li un Imperadôr? Oh ce sorte di bestie!
O ben, plui a la libare:
– Chê robe li un imperadôr? Velu li un gnognul!
Saltìn cumò intal Friûl di scuasi mieç secul daspò, prime Vuere Mondiâl. A Rude a son daûr a fâ sù une tor gnove, plui grande di chê che a àn za. No je finide ma vonde alte par fâ di osservatori su lis batais che a son daûr a discjadenâsi sul Cjars. A un tîr di sclope, si podarès dî. Colonei, gjenerâi a montin sù par viodi e par rindisi cont. Une dì e passe une sdrume di chei papavars, biel che i vecjuts di Rude, chei vonde in là cui agns di podê permetisi, a stan li a contâsile.
Cumò lassingi la peraule a Ferruccio Tassin, Robononis, ed. Braitan, Cormons, 2012:

“- E chel li cui isa? Al domanda un di lôr.
– Al Re d’Italia-gi rispuindin chei atris, scuasi in tun sunsûr.
Alora lui, che al veve viudût l’imponenza di Francesco Giusepe, al sclopa intun:
– Ma isa un re di mandâ ator chel li!”

Napoleon III al gjolt di un monument intal parc Sempione di Milan.
Ancje Vitôr Emanuel III al à un monument a Reggio Calabrie.

Chê femine di Raucourt no à nissun monument. E nancje chel vecjut di Rude nol à monuments.

Materie: Lenghe Foreste
di…
#1905