cc26Setembar#29 – Tramai Artificiâl

#29 – Tramai artificiâl

E jere une gnot scure e cence lune, e il vecjo professôr Francovich al pensave a une sere come chê, di tancj agns indaûr, cuant che al veve vude la idee che e sarès stade la maledizion de sô vite: il TAI!
No, no il tai tal sens dal got di vin, lui al pensave al Tramai Artificiâl Inteligjent, o ben la invenzion che e varès puartade la umanitât a un progrès impensabil. In chê volte la I.A. e meteve a disposizion di ducj dut il savê uman, i libris, i studis, lis formulis par risolvi cualsisei probleme. Al someave che la I.A. e ves dutis lis rispuestis, cuissà se veris o no…
Ma Francovich al veve capît che no bastave la teorie: a ce zovial un bot che mi dîs cemût cambiâ une ruede, se no soi bon di molâ i bulons?
Cussì al veve elaborade la teorie dal calcul cumbininatori: un algoritmi bon no dome di cjatâ soluzions, ma ancje di aplicâlis te realtât. E di chel algoritmi, instalât sul robot plui avanzât, al jere nassût TAI, Tramai Artificiâl Inteligjent ma ancje Trabacul Algoritmic Ipercumbininadôr, basât su la formule universâl de filosofie furlane clamade CUMBINÌN.
E di fat TAI al cumbinave dut: par cui che nol jere bon di cuei une fertaie, TAI no dome al tirave fûr la ricete, ma al cjatave ancje la miôr fersorie sul marcjât, i ûfs dal contadin biologjics, e al mostrave ducj i passaçs par vê une fertaie fofe, indorade e deliziose.
La int e deventave mate daûr di TAI, ma no jere buine di stratignîsi. Parcè contentâsi di fâsi judâ tes voris plui semplicis? E no domandâi cemût robâ intune bancje, o influençâ i marcjâts finanziaris o costruî armis plui potentis?
Francovich al jere avilît: ducj a pensavin a doprâ TAI par fins egoistics, nissun i veve domandât cemût fâ finî il razisim o il bulisim, o la fam o il cambiament climatic… E pûr la soluzion e jere a puartade di man.
Cuant che il mont al jere sul ôr de tierce vuere mondiâl, Francovich al veve incalmât un virus te formule dal cumbinìn e al veve disativât ducj i TAIs. Ce ocasion pierdude, al veve pensât.

Materie: Tecnologjie
di…
#1931