SCUELECURTE – IL REGOLAMENT

CorseCurte26/27

LA SCUELE

SCUELECURTE al è un divertiment leterari in lenghe furlane, al covente a imparâ alc, a tignî sveât il çurviel, a straviâsi, a lei e a scrivi contis.

I students di ScueleCurte a àn di scrivi UNE CONTE AL MÊS, a tacâ cul mês di Setembar fin al mês di Mai (9 contis in dut). La conte e à di jessi ispirade a un dai COMPITS che i professôrs da lis variis materiis a daran a ogni prin dal mês.

A ogni mês i Professôrs a daran la lôr valutazion a la conte, il Dirigjent Scolastic al darà il vôt di condote e ae fin dal mês e dal an si fasaran i scrutinis.

IL CDC

Il Consei di Classe de ScueleCurte al è chest ca:

FURLAN: Leterature Furlane (di vîfs) – Prof. PK

LENGHE FORESTE (TALIAN): Leterature taliane di autôrs furlans (vîfs) – Prof. TD

STORIE: Events storics furlans (magari no simpri chei) – Prof. PC

GJEOGRAFIE: Ambients e paîs dal Friûl (di ogni sorte) – Prof. DB

MATEMATICHE: Matematiche… leterarie – Prof. AF

SIENCIS: Siencis furlanis (di ogni sorte) – Prof. AM

ART: Art di furlans (vîfs) – Prof. NS

MUSICHE: Musiche Furlane (di vîfs) – Prof. MA

TECNOLOGJIE: Imprenditôrs e impresis furlanis – Prof. BM

GJINASTICHE: Sportîfs dal Friûl e impresis sportivis furlanis – Prof. RZ

I professôrs e lis professoris dal CDC a vignaran indicâts dome cun dôs letaris (a podaressin jessi lis iniziâls di non, cognon, sorenon, o adiriture sieltis a câs… no si sa). La lôr identitât si scuvierzarà dome ae fin dal an scolastic.

Il Dirigjent Scolastic de ScueleCurte al è l’Ostîr, che al darà ancje i vôts di condote.

La Segretarie Didatiche par burocrazie e diplomis e je la Gjatemarangule.

CALENDARI

OGNI PRIN DAL MÊS a vignaràn publicâts sul sît i compits scrits dai docents e si à timp dut il mês par sielzi une materie, scrivi la conte e mandâle.

Dentri dal mês dopo ogni prof al darà il vôt a la conte, l’Ostîr al darà il vôt di condote.

COMPITS

Lis contis a àn di jessi al plui di 2000 CARATARS, spazis comprendûts, ma si pues scrivilis plui lungjis sbassant il vôt di condote. Lis contis a son anonimis, si scuvierzarà il sorenon cu la publicazion des votazions e la identitât dai students ae fin de ScueleCurte.

I compits a son di doprâ dome come ISPIRAZION e non àn di jessi un vencul, ma si à di declarâ cuale materie che si à sielzude.

Lis materiis Furlan e Lenghe Foreste a daran i compits ogni mês, chês altris materiis un mês sì e un no (Storie o Gjeografie, Musiche o Art, Matematiche o Siencis, Tecnologjie o Gjinastiche)

Par il mês di Mai, ultin di ScueleCurte, a saran dâts compits in dutis lis materiis.

ISCRIZIONS

Al baste mandâ une mail a contecurte@gmail.com dentri dal mês di Setembar e sielzi il SORENON. No son limits di numar ae classe. O vin puest!

Dome l’Ostîr al lei lis mail e dome lui al savarà cui che o sês fin ae fin de scuele.

Nol covente jessi scritôrs o savê scrivi par furlan; il DS us darà dal sigûr une man.

Cui che al à za rispuindût ae mail esplorative dal Ostîr al à za vinçût une Justificazion, ma al à di confermâ cuntune mail la proprie iscrizion. Ducj chei che a si iscrivin dentri de Madone di Avost a vinçaran une altre Justificazion.

IL NON DI GARE

Si à di SIELZI UN SORENON, ven a stâi un non di gare.

Da rest, a scuele, magari cussì no, a si à ducj un sorenon. Il biel de ScueleCurte al è che o podês sielzilu voaltris!

VOTAZIONS, CONDOTE, SCRUTINIS

Ogni professôr dal CDC al darà i vôts a lis contis, cuntune VALUTAZION di 1 a 10.

Si pues cjapâ ancje i vôt a miezis (7 1/2, 5 1/2 e v.i.) e i + e – (8+, 6-, e v.i.); come a scuele chescj vôts a valin 7,5; 8,5; 8,25; 5,75 e v.i.

Il Dirigjent Scolastic al darà des indicazions al CDC (origjinalitât e struture de conte, atinence al teme, bontât dal furlan), ma i docents a son libars e parons, sedi te sielte dai compits, sedi tes votazions.

La valutazion de CONDOTE e je dade dal Ostîr partint di 10 e gjavant un pont a ogni penalitàt come la consegne inte ultime dì dal mês, consegne cuntune dì di ritart, sforament di caratars plui o mancul grant (in gjenerâl 1 pont di mancul ogni 100 caratars).

Se un mês un nol rive a scrivi al pues JUSTIFICÂSI (simpri se al à la justificazion). In chest câs nol cjaparâ 0 ma al cjaparâ la votazion medie plui basse de classe.

Il vincidôr de ScueleCurte 2026/27 al sarà il student cu la medie finâl plui alte.

In câs di medie a pâr al sarà denant chel cul scart cuadratic plui bas.

Cui che al rive prin al cjape il diplome di vincidôr de ScueleCurte, che al vâl une vore, ma une vore di sodisfazion. Par premis o viodarìn ae fin dal an scolastic…

SCUELECURTE PAR CANAIS

Se o sês fruts des Scuelis Mediis, o se o volês proponi la ScueleCurte come progjet scolastic, visaitnus, o fasarìn une classifiche separade dai canais.

Il Dirigjent Scolastic al è plui che disponibil a dâ indicazions in plui, a stâus daûr e a gjestî la ScueleCurte Par Canais.

Par informazions plui a fonts, vait su www.contecurte.eu o scrivêt a contecurte@gmail.com.

Par restâ simpri inzornâts cu lis iniziativis di Contecurte, iscriveisi te Liste o su Instagram e Facebook.

A chi o podês scjamâ il Regolament de CorseCurte26-27

7 comments