Decrets

Si veve di rivâ anche a di chê, al veve pensât Melio distudant il gjornâl radio plen di fote.
Tai ultins timps i politics locâi a vevin fat a gare a burî fûr leçs e decrets che a contentassin i moviments de panze de int e la indignazion dai social.
Al jere scomençât cui diviets.
Une biciclete e cjapave sot un gjatut? Putiferi su Facebook? E lôr a vietavin lis bicicletis.
Un pin al sporcjave lis machinis di pêç?  Balfuerie su Instagram? E lôr a fasevin taiâ ducj i pins.
Un puaret al leve a risi di inneâsi intun riul di aghe? Scandul su TikTok? E lôr a vietavin a ducj di meti i pîts intai riui.
Se nol fos di vaî, al sarès di ridi.
Ma dopo la corse al consens e jere lade plui innà: a vevin tacât cui oblics.
E velu li, il decret jentrât in vigôr intal nord-est propite chê matine.
Di no crodi.
Ma Melio al veve scugnût crodi za inte casse de Conad.
«No, mi spiace,» i veve spiegât la cassiere, «col nuovo decreto questa spesa non è regolare».
Melio al cjale il carel.
Lat, spongje, vueli, fetis biscotadis, ton, pomodoruts, cocins, une angurie, i sacuts pes scovacis, une grampade di sugo pront e surgjelâts… nuie di strani.
«Vede, col nuovo decreto deve acquistare almeno 750cl per ogni 30euro di spesa. Altrimenti c’è la sanzione».
No covente ripeti ce che al veve dite Melio e cualis bestiis che al veve clamât in cause, e nancje la piçule barufe cul poliziot. La sanzion e jere plui de spese, cussì, plui par principi che par altri, al veve metût jù un pâr di surgjelâts e paiât 28euros (in contants, par la leç a difese dai bêçs).
Ma la zornade e jere nassude mâl e pene fat il svolt lu vevin fermât i carabinîrs.
«Vorremmo sottoporla all’alcol test, se non le dispiace».
«Ma se a son lis 9 di matine!» ur vose Melio.
«Appunto», i fâs il brigadîr, sot dai ocjai di soreli e la barbe fente (leç sulla privacy delle forze dell’ordine).
No covente tirâle a lunc. Melio nol à bevût nuie, al sofle tal bocheton e al ven fûr un biel zero punto zero.
«Dobbiamo farle verbale, sa con il nuovo decreto… E siamo costretti a sequestrarle il mezzo, a meno che…»
Il carabinîr i segne cul dêt une ostarie.
Melio al fâs doi conts.
Scjampâ vie al è fûr discussion. E je la gnove leç sulla “fuga dai blocchi stradali”, 35 agns minimo. E il dissecuestri dal veicul al coste plui de sô tredicesime.
Cussì al jentre in ostarie, incrosant un cjoc disfat, e al pare jù chei doi trê tais, par jessi sigûr di podê vuidâ.
Cuant che al monte in machine (cjapantsi sù il verbâl poiât sul veri) al vioôt che i carabinîrs a son impegnâts cul cjoc di prime, che al à sdrumât cu la sô machine un di chei defribiladôrs di emergjence che a metin intes placis dai paîs.
«È uno scandalo!» al berle filmant cul telefonut. «Guardate che danno! Sono un operaio onesto io! E adesso chi mi ripaga!»
Melio nol sta a pierdi timp. Stant che il vin i sta za dant sù al torne dret a cjase.
Inte sere, impiant il gjornâl radio, al scuvierç che al è pene vignût fûr il gnûf decrêt par gjavâ vie des placis ducj i defribiladôrs.

di Milio dai Cjans
#1901