Une forme di riscjo

Une forme di riscjo

Marc al metè la pene su la taule cjalant il cuader inmò in blanc. Al jere rivât a vieli e al varès vût di jessi pront a lassâ un so scrit. Chest jal diseve Zorç, un so nevôt, che si jere ufiert di scrivi lis sôs memoriis come “scritôr fantasime.”

“Tu tu fevelis e jo o scrivarai” i veve proponût.

“La tô vite e merete di jessi contade,” i disè.

CC BY-NC-SA 2.0 Dick Vos – d_t_vos su Flickr

E e jere vere. Marc al vignive di un piçul paîs furlan, che al puartave inmò i segns de vuere. Za adult al veve madurît la idee di emigrâ. La valîs e pesave mancul dai siei cidinôrs.

E no jere la mancjance di ricuarts che lu stratignive di scrivi un libri, pluitost un ecès di lôr. In chês pagjinis, no saressin stâts descrits dome i fats plui impuartants: l’emigrât lavoradôr, il buteghîr rispietabil… A saressin vignudis fûr ancje lis zonis fumatosis. Marc al pensave ai siei di famee, ai vicins che lu saludavin cun rispiet, ae comunitât che lu veve adotât come un dai lôr.

Ce saressial sucedût se lis peraulis a vessin disvilupât nome la version comude de sô storie? Se il libri lu faseve deventâ plui uman di chei che a jerin ator di lui? Vadi, saressino stâts pronts a tolerâlu? Zorç lu clamave ogni tant. “La memorie e je ancje une forme di justizie”, al insisteve. Ma Marc al suspietave che la memorie e fos, soredut, une forme di riscjo.

Chel dì a buinore al vierzè il so cuader. Al scrivè une lungje frase: “No soi simpri stât l’om che tu pensis che o sedi”. Marc, chel sproc lu leiè une vore di voltis. Al sintì pôre, ma ancje un solêf strani, come cuant che la nâf si slontanave dal puart e no si podeve tornâ indaûr.

Al sierà il cuader. Nol saveve ancjemò se al varès clamât Zorç. Nol saveve se il libri al varès viodût la lûs dal dì o se al sarès restât sierât dentri di un cassetin, come tantis letaris mai mandadis.

Pe prime volte al capì che il vêr dubi nol jere se a varessin acetât la sô storie, ma se lui al varès olsât acetâle dal dut.

di Galliano di Buenos Aires
#1900

2 comments