Il Timp

Dut content, contenton de sô scuvierte al cor li dal Signôr par dâi la buine gnove:
– Signôr o soi rivât al numar complet, i ai dât un non e un numar a ducj i dêts des dôs mans: un il poleâr, doi l’indiç, trê il mezan, cuatri anulâr cinc il dedut, e po sîs, siet, vot… vot! No ise vere che vot al è un biel non? E po nûf e dîs!

– Brâf, brâf, tu sês stât brâf, propit. Però, cumò, fermiti li. Fermiti li, eh! No sta pensâti altri, ognun dai tiei dêts al à il so non cumò! e cumò vonde li.

Ma a lui no i pâr mighe juste cheste storie! Al rumie sù e al torne a rumiâ. Eh, insome! E je vere che ogni dêt al à il so numar e ogni numar il so non, ma… No aio ancjemò dêts? No sono dêts chei dai pîts? E rumie che ti rumie al finis par inventâ altris nons par altris numars par altris dêts: undis, dodis, tredis…fin a vincj!

Ma il Signôr, cheste volte, no le cjape nuie ben! No ti vevio dit di fermâti lì, no tal vevio dit? E cumò nancje no tu sâs ce che tu âs cumbinât!

– Parcè, ce aio cumbinât?

– Tu âs gjavadis lis cjadenis al Timp! Che jo lu vevi ben domeât e cumò nissun lu ten plui, al è libar di cori dapardut in dut l’Univiers! Tu tu crustarâs ogni dì la tô punizion, di cumò in devant, ogni dì une robe che si clame orloi ti tucarà intal zorneli, tic e tac, visiti, ti disarà, o comandi jo, tu tu sês dome un fruçon di nuie, ti lassi cori une dì, dôs, cinc, mîl, cent mîl se o vuei. Ma cuant che mi salte sù o tiri la cuarde e tu tu sês polvar!

Lu sintistu che al ti fevele, che al ti fevele l’orloi, che al ti fevele il Timp? No covente il Signôr par punîti, tu le âs cirude e volude tu la tô punizion eterne! Puar om!

di Laurin Zuan Nardin
#1899

1 comment