Gaia

O soi propit stufe.
Vot miliarts di oms che no fasin altri che fiscâ sù dut. Cuant che, tant timp indaûr, a jerin in pôcs, mi fasevin ancje pene. A jerin stâts li li par discomparî dal dut. No propit lôr ma i lôr bisavons.
A àn eliminât chei che i sameavin e dopo a àn invadût ogni spazi disponibil.
Tu ju cjatis ta lis planis, tai deserts, su lis monts, tal mâr, tai flums, parfin inte glace polâr. A consumin dut. A incuinin, a impestin l’aiar e la aghe. A samenin dute la tiere di scovacis e dut il mâr di plastiche. A copin dutis lis bestiis salvadiis par cjativerie o pal pûr plasê.
Insome, o soi propit stufe tant che o ai cjapât une decision. Sì, o sai che e sarà une decision definitive e che un pôc e fasarà mâl ancje a me, o miôr, al gno zardin.
Jo no soi dome un planet ma ancje une Grande Ment, un spirt invisibil.
O doprarai dute la energjie mentâl che o ai par fâ une robe.
O ai di sugjerî a un pâr di lôr che a àn il podê su lis nazions di metisi l’un cuintri chel altri. Di desenis di agns a àn metût sù armis simpri plui potentis par scanâsi tra di lôr.
Dute la storie de lôr civiltât e je fate di maçalizis.
Bon cumò la ore e je rivade.
Che a fasedin partî ducj i lôr missii.
Che si copin ducj.
Che nol resti in vite nissun di chei maladets!
Che a muerin!
Sì, par secui o sarai incuinade ma dopo la vite e tornarà a cressi, in altris formis, sperant che tra lis speciis no tornin a disvilupâsi altris creaturis orendis a dôs gjambis e a doi braçs.

di Checo Tam – II classificade al Concors Vôs de Basse 2026, sezion Narative
#1898

1 comment