LCPBDM #7.4 – A balâ in place

E se a lessin a Vignesie?
Eh? Tu lu âs cjalât come che si cjale un mus che al svole.
Cuant? Daspò dai esams? Sì, parcè di no. Tu i âs rispuindût, tant par di alc. Ma no, coione! O dîs cumò!
E in chel moment, no dome il mus al svolave, ma si jere ancje metût a fâ marculis e cjantâ cu la vôs sopran un jodel punk.
A Vignesie la vilie di Nadâl?

E di li al è jere dut lât di rive jù, come une piere tirade di une mont. Tu lu vevis cognossût nancje un mês prin, chel moro magri e ferbint che ti veve matchât subit su tinder e che te stesse sere, cence tantis cjacaris, ti veve puartade cjase sô e sveade cuntune brioche frescje, cun dongje dut ce che al jere sucedût dilunc de gnot. E no ti jere displasût nuie, avonde par tornâ a viodisi un altri pâr di voltis e la tierce adiriture cence lâ a finîle tal jet. E ancje l’aperitîf a la Vilie di Nadâl ti veve parude une robe avonde fûr cu la cassele, ma tant, tu lu varessis passât a studiâ pal esam di Privât, che tu vevis l’apel ai 7 di Zenâr. Par studiâ tu vevis sghindât parfin il cenon in famee, disint che tu saressis tornade la dì dopo, par il gustâ. Ma lâ a Vignesie… la sere di Nadâl… Al jere mat. Avonde mat par metisi a smanetâ sul telefonut e dopo vê sielzût i oraris dal tren e i presits dai albiercs cjalâmi e dimi di movimi, che a podevin cjapâ chel des dôs e cuarante rivâ a viodi l’amont in lagune.

Mazurka klandestina – Diego Cantore

Cun cuarante euros par om, mi fâs, le puartin fûr. E par doman a gustâ tu sês cjase. E al jere stât cussì. E place San Marc e jere mieze vueide, e o vevis cjatât un bacaro inclaudât intune calle che o jeris dome voaltris e cuatri vecjuts, e o vevis bevût vin neri e mangjât bacalà, e o jeris lâts a cjalâ l’isule di Sante Margarite che si pierdeve tal umit, e a ti ti veve vignude voie di balâ, ancje se la musiche di discoteche no ti jere mai plasude e lui al veve dite, O sai ben jo ce fa, e al veve metût une cjante cul telefonut e sot dal leon a vevis balât, cun ducj che us cjalavin e chê cjançon li, che no tu savevis nuie di jê, e jere la plui biele dal mont.

MY OLD WAYS, Tame Impala, Deadbeat, [2025] 4’58”