Blestemis

Severin al blestemave, sì lui, che al blestemave. Però cence voie. Daspès, daspessut, ma simpri cence voie. “O vevi apene finût di mongile la vacje stele, no si impensie di tirâi un rip intal seglot che al è stranfât mieç lat! O ai molât jù cuatri sacraments, cence voie, che nissun sa!” “ O jeri daûr a samenâ che nol ti vegnie jù un sglavin di pantanâ su dut, di no podê finî, cuatri sacranons, cence voie, che ancjemò a tremin i arbui!”

Checo, invezit, al blestemave ancje lui, sì, però al zontave che la ofese e jere par sé e no par Lui. “Porco jo, no lui, eh!” E cul dêt al mostrave là sù.

E po a jerin blestemis e blestemis. Grandis e piçulis. Lì dal cjamp di balon a si miscliçavin che al jere dut un davoi. “A lui là, al cuatri dai lôr cuant che al à fat chel sgambet, l’arbitro no i à dit nuie, e invezite a gno fì lu à amonît!” Al veve blestemât… “e po ben? une blestemute piçule, di nuie!”

E a jerin chês a fin di ben. Se i bûs a si impastanavin di no volê plui lâ indevant, alore, e vignive a coventâ une buine rie di madonis sberladis a fuart che lis sintive ancje il muini che al jere a stâ in bande dal tôr, “ma no sta lâ a dîi al plevan, eh, Vissens, che ti pai un tai”.

Ma ducj a savevin che no bisugnave blestemâ, se no ti murivin lis gjalinis. Turo al veve un biel pulinâr e no si rivave a capî ce maniere. “Ma no ti muerino lis gjalinis a ti cun ducj i glorios che tu tiris jù?” “Sì che a mi muerin! Cuant che ur tiri il cuel”.

Vigjut al veve fate pocje scuele, ma al saveve lei. No propi simpri e no dut ce che al jere scrit. Il cartelon che intal ENAL al informave che: ‘la persona educata non bestemmia e non sputa per terra’, chel, al faseve une faturone a leilu. Al veve provât un pâr di voltis, ma al veve rinunziât par in vite. L’ustîr i mostrave sevêr il cartelon cuntun dêt: alore Vigjut? No sai a lei, jo, ce isal scrit? E po no spudi mighe!

E Gustìn muradôr? Lui, biel che al butave su malte, al cjantave: besteeemmie mai piùuu, son tantiiii coltelli al cuor diiii Gesù. Però se i colave la stase pal zurio, al veve fature a visâsi dai bogns propuesits e al tirave jù tantis di chês curtissadis a chel cûr!

Ma chestis a jerin robis di paîs. Intal grant, invezit, intes citâts, inte politiche, ce maniere lavie la robe?
Eh! Chi la robe e jere plui complicade.

Al jere une volte un siorcjossul che i plaseve tant contâ barzaletis, ma i coventave un public grant par scoltâlis, mighe dome chei cuatri sclapeçocs di une privade o di un chiosc cualsisei! E alore, stant che al veve fats tancj di chei mistîrs, al si impensà che il caporion dal guvier no lu veve ancjemò mai fat. Dite e fate: velu che al comande lui, e cumò lis sôs barzaletis lis scoltin in miârs, ce disio? milions di int! Ce godurie! Ma di guai! Une dì no i scjampie (cence voie?) un porcul. Nuie pôre. Al è pront un monsignôr par contestualizâ.

Contestualizâ? Ce vuelial dî?
Provìn a domandâi a Toni Brucje. Che lui al doprave la blesteme contestualizade, ben prime che chel monsignôr là al vignìs dongje cu la sô filosofie. Le saveve ben, Toni, cheste facende de contestualizazion. Sì, parvie che, in chê dì che e jere la zornade dai donadôrs di sanc (o savês, nomo, cuale dì?), finidis lis cerimoniis e i discors, si jerin dâts dongje ducj intal ricreatori, lì dal plevan, par mangjâ une fete di salam e par bevi un taiut di neri (anzi, doi taiuts, no, trê…ma no plui di cuatri o cinc, us al siguri! Salacor sîs, ma…)

E lì Toni al veve tacât a contâ di cuant che, in timp di vuere, al jere stât in Serbie, in Bosnie e sepi diu dulà (a son ancjemò in vore studis par stabilî la percentuâl di veretât di chestis contis). Ducj lu stiçavin a contâ: Toni… e in chê volte che… ma parcè no contistu di cuant che… Ducj. Comprendût il plevan: conte, Toni, conte. Ma il discors di Toni al cloteave, come se i mancjàs alc, come se un pît al si poiàs intal vueit. I mancjave il rinfuarçatîf dal discors. E al jere un parcè. Cuant che il plevan al è lât vie, che al veve i siei afârs, alore i rinfuarçatîfs a son sbrocâts fûr ducj intun colp. Une rie di porcui che e veve fature a fermâsi.

Toni al veve contestualizât: un discors cul plevan in scolte e un altri cence il plevan.
Si è vignûts, daspò, a savê che chel monsignôr là al si veve instudiât inte facoltât (de iuris contestualizalibus), che Toni al veve metude su inte sô stale. Des voltis al tignive lezion ancje impids sul mussul dal ledan, daûr cjase. E chel Monsignôr, une volte, al si veve sporcjât l’ôr de gabane.

di Laurin Zuan Nardin
#1887