LCPBDM #7.3 – Ledrose

Tu âs fat disevot, ma a vuelin che a Nadâl tu stedis cjase a mangjâ cun dute la famee. E dute la famee, tal to câs, al vûl dî almancul vincj personis, fra parincj e parincj di parincj. E tu no tu sopuartis nancje un.
Tu sês un fantate ledrose, ti dîs to pari, scherçant.

Ma la veretât e je che al à reson: a ti lis robis dretis no ti son mai plasudis, e compagn la int, soredut cuant che e je normâl.
No tu sopuartis lis agnis, il barbe, i nevoduts e ta chê volte li no tu sopuartis nancje tô mari e to pari, che fin te sere prin a fevelin mâl di ducj e li a son dome che a salamelechin come atôrs professioniscj.

E tu?
E tu tu ti sieraressis dentri de tô stanzie cu la musiche a manete su la casse bluetooth gnove che ti àn regalât, a spacâti di play e a fumâ fin a dislidrisâti i voi. Ma no si pues. No si pues nancje dîlu par scherç.

E alore tu âs dite di sì cence barufâ, sperant che al sedi l’ultin an, ma savint che nol sarà l’ultin.
Almancul podìno scoltâ musiche, dilunc dal gustâ?
Tu lu âs domandât no tu sâs nancje tu parcè, e tô mari, forsit cence savê nancje jê parcè, ti à dit di sì.
Ma no stâ crodi di stâmi dut il timp in taule cul telefonin in man, eh.
Ma no, tu i âs dite. O fâs une playlist e le lassi li.

Baste che tu metis cjançons di Nadâl, ti dîs jê, e a ti va ben ancje chel, pûr di vê alc altri tes orelis che no sedin lis coionadis di famee. E intant che tu tachis a fâ sù la playst ti torne in ment chê robe li, de fantate ledrose e alore tu decidis che sarà cussì ancje la tô playlist.
E la prime cjante che tu metis e je la prime che ti ven tal cjâf. Tu jeris picinine cuant che ti vevin fat scoltâ chel disc li, di chel rapper vecjo ma bulo. E a ti ti plaseve une altre, che e fevelave di meti il cîl intune stanzie, ma chê li, cundut che no jere la miôr, ti plaseve propit parcè che e jere plene di peraulatis e robis sul Nadâl che ti sarès plasût dî ma no si podeve dî. E tu vevis ancje scuviert, graciis a la cjançon e a internet, cui che al jere Charles Manson. Al è il toc perfet, tu pensis.

E tu lu metis par prin, cul repeat. 4’ 16” par 5. Plui di vincj minûts di une cjançon ledrose. E par lôr no sarà dal sigûr la plui biele dal mont.

CHARLES MANSON (BUON NATALE2), Salmo (feat. Lazza, Nitro, Dani Faiv, [2019] 4’16”