Te gnot des distancis

Mi plâs une vore viazâ cul tren. O vevi simpri tal cjâf il desideri di montâ suntun che mi menàs viers soreli jevât.

O cjapavi chel tren cun l’incjant di cierts viaçs dai Agns Vincj. Un scompartiment di lus cun atrativis sioris, sentis comudis e feveladis complicis e interessantis. Dovût aes leturis sore il teme, jo mi viodevi vistût cun bregons ae zuave, barete di lane e une valîs di corean.

Man man che il tren al jentrave te gnot des distancis, si olmavin biei paisaçs cun cjistiei inrocjâts e scuindûts daûr des lôr liendis.

Daspò de cene la serade e continuave. Une siore cun adeguât maneç e scomençà a contâ storiis dal puest, il dran dran dal tren, il pôc lusôr dal vagon, il fum dai aromatics zigars e altris fumeris le judavin a creâ un clime particolâr.

O restai striât cun la vôs de contadore, che mi menà subit te medole di chê storie che jo tant o ambivi.

Al improvîs o sintì il zemi di un violin rompint il cidinôr e il svelt scomençâ di une sucession di notis, che a finirin intune legre danze ongjarese.

La caroce si jemplà di sunôrs slâfs, di colôrs vivarôs di chês etniis co levin cjatant dulinvie il percors. No mancjavin ni lis chiromantis, ni lis cartomantis.

E ancje mi parè di viodi platât daûr di une tendine il tabâr neri sfodrât di ros di Vlad, il cont Dracula.

Cence dâmi cont, la palme de mê man e jere tra lis mans di une biele e zovine chiromante, cheste cjalantmi dret in muse mi dîs: – In curt tu tu fasarâs un biel e lunc viaç in tren, che ti cambiarà la vite.

Mi remenai te sente. Mi dismovei, o vevi la bocje sute e lis mans sudadis, sfladant te scurece de stanzie o ricognossei il puest: o jeri tal jet di cjase mê.

di Gallian di Buenos Aires
#1848

1 comment