Il teme pe CC24 di Dicembar

In prime rie

Regalàimi i dolz rivâi de Lìule
lis zuculis di Nene a’ son denant de puarte
e fûr da un grant
il soreli al ven dentri pal barcon
tasint peraulis smenteadis

Mondimi me, che par volê florî
su la Sfuèime a di chest’ore
il fal al è crodisi doma splaza
e cuan’ che tu sarâs za muart, ma muart
e cuanch’al mierle
tun campo a Buchenwald
bisats
citâs, stradi, àndis:
tu sês fêr di mil agn.

Mancu mal che la vierta
mi plâs di misurâ dì par dì, ce c’al reste
piàrdisi tal mâr dai siùns.
Cansonetute chiste
il colór dal timp al è un colór di albis.

Biel che denant di un spieli
nome se tu ti voltis indaûr
pal borc si sint a dî
al  podeva capitâte anç a ti.

«Hai usato ChatGPT, guarda che me lo puoi dire…»
«Ma no, siore mestre, no si dopre plui chel, sù mo, al è a paiament cumò».
«E allora… qualche altra diavoleria artificiale, oppure… l’hai copiata da internet».
«Bon, su chest no pues dineâ. Copiât o ai copiât».
«Ah! Ecco! E di chi è questa meravigliosa poesia. Dimmi l’autore!»
«Eh, posippo! Cumò mi met a cjapâ note dai autôrs… No vevi mighe timp di pierdi. O vierzevi a câs».
«In che senso? Intendi che ci sono diversi autori? E poi… smettila di parlare in friulano!»
«Eh, no, siore mestre. Cheste e je la ore di furlan, e jo o cjacari par furlan. Che mi meti pûr la note, dut câs, o intindevi che o vierzevi a câs une antologjie di poetis furlans che mi à dât gno nono».
«Quindi hai copiato da diversi autori».
«Eh, bon, siore mestre. Se vûl metile cussì… Jo le clami ispirazion. O vierzevi a câs, o leieivi la prime rie, e se mi someave buine, le cjolevi, si no vierzevi une altre pagjine».
«Solo la prima riga?»
«E, ce vulie… jo mi stufi subit. Se voi indenant a lei, soi za che pensi a altri. Une rie a mi mi baste. Ma insome… o ai fat il compit, no?»
«Sì, ma copiando».
«Siore mestre, no soi mighe nassût poete jo. Le ai cumbinade come che o podevi. Che mi meti il solit Insufficiente e a puest cussì».
«Non credo proprio! Insufficiente non è il voto che ti meriti».
«Eh, po! Ce isal chel li? Un zero?! E ma no! Nol è just. Zero si lu da cuant che un al consegne blanc… va ben che soi stât cinc minûts, va ben che o ai copiât dut, ma zero no, no mal mereti…»
«Non è uno zero, fammi finire».
«O… t… t… Ottimo?!»
«Te lo meriti. Mancherebbe solo un titolo, ma chest, se tu mi permetis, lu zonti jo».