CC24Dicembar#15 – L’ultin zûc

#15 – L’ultim zûc

Tasint peraulis smenteadis
che dibant e’ àn cirût di fâsi flôrs

Al voleve che cul cjaminâ i tornàs la memorie e cjatâ il puest di bessôl.
Al jere martars viers misdì. Pocje int in visite. I manoâls plui che lavorâ par fâsi viodi come lis domeniis daûr da la buine man, a cjacaravin sot la ombrene di un grant vencjâr.
“I cimitieris des grandis citâts a son cualsisei robe mancul che sacris”, al ricuardave di vêlu lêt in cualchi bande.
“Dret fin tal pantheon navâl, daspò al cjapâ il prin coridôr a çampe, e daspò… sì: la prime crosere a diestre… Man man che al leve indevant pal troi par rivâ te tombe si inluminave tal so cjâf come se al vignìs chenti ducj i dîs.
In pôcs minûts al jere rivât. Lis jerbatis a cuvierzevin dut. Al gjavà fûr chês che a coventavin par podê viodi la plache cun il non e la foto.
Lunis a jerin tacadis lis sôs feriis, cence bêçs e par chest cence il viaç che al jere usât e di bessôl. “E alore” – si veve dit – “a fâ robis come il vieri che o soi. Comedâ chês robis di famee da timp conservadis in scjatulis e scjatulutis”. E une e jere plene di fotos. Si jere sentât comut par metisi a viodi ognidune. E al ricognosseve cuasi dutis lis musis, nissune che e fos ancjemò in chest mont.
Lui al jere l’ultin de famee.
Si e fermât intune foto di Nadâl. Lui di vot agns cui parincj plui drets. Paris, nonos, fradis, barbe e agne. Un sens di angosse al veve tacât a cressi. Tant che no i bastave dîlu a la sô cjase vueide. Ni a lis musis de foto.
“O larai doman tal unic puest dulà che mi sinti di lâ”.
Si jere metût in zenoli de bande de tombe e al veve fât sù un cjistiel come cheis di cjartis, ma cun lis fotos, intant dute la angosse e jere saltade fûr come une preiere.
“Sâstu mari?” al fevelave cjalant fis la imagjin de plache.       “Îr mi soi visât che o ricuardi i nons e lis musis di dute la famee. Ma – e une sole lagrime a veve tacât a colâ par un smursiel – nome chel. A mi smamissin ogni volte di plui lîs vôs, lis manieris di cjalâ, lis barufis o lis ligriis, come che si passave il timp in taule o come che al cjantave il nono. Pluitost mi ven dut un messedum tal cjâf e tal cûr. Cuissà se cuant che ti cjati – nol mi mancje tant, o soi bielzà une vore vieli – a si comedaran i ricuarts e lis animis”.
Al e restât in spiete cul cjâf in blanc fin che il vint dal tramont al veve sdrumât la pile di fotos. Si jere alçât cun fadie e la schene dure. Daspò al veve tornât a metilis dentri de scjatulute e al veve zirât cence mete par mieze ore, prime di cjatâ il puarton di jessude.

di Zorç Cesaratto (Matungo)
#1832

1 comment