CC24Dicembar#12 – Chel toc di cjarte

#12 – Chel toc di cjarte

“Tu sôs muart tu, fantàt
ad altri no stâ crôdi, tu sôs muart!”

Il prin lu veve cjatât lunis a scuele. Al jere lat tal bagn e cuant che al tornà, al vignive fûr dal so libri di storie. Lei e butâlu vie al jere stât un lamp.
Pal secont al jere cun Nino, di martars. Intant che e rivave la sô morose Lina, a fasevin un bocon insiemi. Il toc di cjarte al jere platât disot dal so hamburger.
“E chest, Pieri? Ce isal?” I disè cul toc in man. “No savarès” i rispuindè, avilît. “Al è compagn di chel manga gjaponês. “Dead note”! No ti visistu?, lu vin let insiemi!” Al dineà, stupît.
“Dead note”! Dulà che un fantat al jere daûr a copâ i delincuents par cjastiâju.” Al insistè. Al veve mudât muse, Nino si inacuarzè subit.
A scuele, Pieri al veve tacât a rivâ cun ombrenis neris sot i voi. Si cjalave intorsi a ogni moment. Nino al smicjave di lontan il so lâ e tornâ.
Chel dal miercus lu veve cjatât Lina te sô sachete cuant che e cirive lis clâfs de cjase sô, tant che Pieri al veve lis mans impegnadis cu lis robis compradis tal supermarcjât. Difidente i domandà: “E chest? Cui tal aial mandât? Ce âstu fat?” ”Nuie”, ma cence cjalâle tai voi.
Daurman e capì che alc nol tornave. Al jere scaturît, al saltave par aiar se si sintive fevelâ di daûr. Si visà che Nino i scrusignave lis sôs robis di scuindon, tant che un investigadôr. E cundut tal super chê fantate plui piçule che si jere inçopedade cun lôr.
Joibe a scuele Lina e veve tornât a viodile, che no ur pierdeve di voli a ducj i trê. Chê frute e cjalave dut di adalt. I faseve pensâ a un gjat che parsore il mûr al è daûr a spietâ la surîs che e vegni fûr de sô cove.
Vinars di sere lu veve cjatât sô mari, te vecje stale dal nono. Si jere impicjât cu la cuarde dal mus, ancje lui muart chel Invier. Al pindolave ancjemò, intun bal orent.
Tes sachetis al jere dome un toc di cjarte. “Ti maledis di chê gnot che tu mi vevis violentade dongje dal lâc. Mi âstu lassade plene e cumò o larai dai carabinîrs. Tu sês muart, fantat!”

di Mari de Gnot Nostrane
#1829