CC24Dicembar#06 – Como una vena

#06 – Como una vena

E fûr da un grant
urli ch’al era
ancimò nemâl,
como una vena
di aga dal cret
una vous, […]

E fûr da un grant urli… Diu si spielâ tal cîl stelât e si muardè i lavris.
“Ah Diu ce che o ai fat, ma propit chei doi li. Vuê ancjemò cu la fuee, ma di doman a saran i plui sfigâts. Ju ai poleâts (a vevin dut il ben di Diu); ju ai rifinîts (a son piturâts in ducj i museus dal mont); i ai dade la mê soflade (e subit in famee si son barufâts e copâts); po i ai dât peraule (e mi rugnin, sbelein e fricin come pins di cune). Us ai pensâts in moments diferents ma cun sintiment, mi soi impegnât. Prime i crets par fâ di fonde, po jerbis cui siei colôrs e nudriments, nemâi di ogni puest e fate, anticipazion di chel fenomeni, l’Homo Vitruviano, compendii di bielece e spirt tra cîl e tiere. Jo o viôt dilà dal timp. Il gnûf nassût, il simiot, al à dât di ca par un pôc ma cumò al va denantdaûr. O ai fat il gno, cumô o polsarai, jevarai sù a la dibisugne, rangjaitsi, i mieçs che ûs coventin ju veis… E pûr ti ai pensât cul cûr, ma no tu ti sês voltât indaûr par un “Gracie pari”. Al scolte dome se stes, al gjolt dal so selfie, o si distire su la poltrone dal psicolic cuant che nol fâs di piês. Jo o soi il Verbo! La uniche vôs che e dismôf i cûrs, e impie lusignis tra i fantats, us fâs contents cuant che o regalais un pôc di voaltris a chei altris,  che as fâs svualâ ancje cui pîts par tiere. Atents, par cuintri “Us ai dât orelis ma no capissarês, voi ma no viodarês”. Oh Diu ce stufe, o soi propit strac di fevelâ cul aiar! Cualchidun però al à capît il gno sium. Pensaitsi tal cosmi, cence casc, a voi vierts tra stelis, e planets, no aie di sclopâus il cûr par dute cheste bielece che o ai ancje ribaltade su la Tiere? (Il silenzi lassù mi cjante laude ma ca jù la vuestre confusion us slontane , no scoltais). Cemût fâstu a nô continuâ la mê vore cu la tô vite! Cun coerence, coresponsabilitât, buine volontât. Berlilu a chei che a son inmò simiots, evolûts dome tal tacuin e tal bultric. Cumò e par simpri, chestis son peraulis di sanc e di gracie. Come che al fâs ogni gjenitôr, ogni inamorât, ogni malât.  Se no saran peraulis saran porcons par furlan, ma contaimi cemût che o stais, cireitmi e o viodarin di capisi! Bon Nadâl creaturis, tornait simpri a nassi!”

Stiefin Asquini (Siruc)

#1823