CC24Dicembar#08 – Federico Tavan

08 – FEDERICO TAVAN

E cuanch’al mierle al à perdût la vous pa’ la val ce freit

E voaltris, int di buine volontât, che si preparais a celebrâ ancje par chest an la Vilie da la Fieste: no stait a pensâ che il grant lusôr che di cualchi timp lA gnot si impie parsore dal Cîl di Betlem, in Palestine, e sedi le Stele, le Biele Stele dai Re Magos. Di sigûr i podarès someâi: sflandorose, alte in te gnot scure e inglaçade dal Solstizi, cu le sô code colorade di flame, dute faliscjis e zirandulis di fûc. Le liende e conte che le Comete si fâs profezie di events che pai oms a puedin segnâ il destin dal Mont: cualchidun al dîs che e indiche le nassite di un grant re, o di un gnûf Profete. O pûr ancje di une disgracie paurose. La fin dal timp o lis puartis dal Infier che si spalanchin par gloti intun bocon cheste puare, biade e tibiade Umanitât. Nie pôre: podês metisi il cûr in pâs. Nissune Stele. Dome une bombe. Un missil. Une frosete di muart. Lait a celebrâ come ogni an il rituâl sacrâl che si consume devant dal altâr dal Templi dal Diu Bankomat. Comoveisi ancjemò une volte, prime di lâ a cene invidâts a le mense di Epulon, in tal sintî le storie di chê famee strambe di profugos parade fûr di ogni cjase, parcè che nol jere puest par lôr di nissune bande, in Paîs. Sirians, Afghans, Pakistans, Subsaharians: vele chi, incjarnide in te Storie, le “Sacra Familia”. Adalt, “in excelis Dei”, l’arcagnul GabriDrone al nunzie le Stragje dai Inocenz. Un brindisi a le salût di Erode.

di Angelo  Floramo (Torototele)

#1825