CC24Otubar#25 – Plinio

#25 – Plinio

Une volte no jeri cussì. O vevi doi voi celescj simpri vîfs e legris, che si bagnavin dome cuant che o corevi in bici tal aiar fresc. Cumò o scugni parâmi tal câs che al sedi dongje di me cualchidun che al barufe, no mi ven nancje plui tal cjâf di comprâ il gjornâl, nancje di lâ in bici…
Al è sucedût cuant che gno fradi mi à pestât, la sere de fieste di complean dal pai. Mi soi sintût svuedât di ducj i sintiments intant che mi cjapave a pugns. Come tai films, il nâs mi à sanganât e e je vignude fûr une frase a efiet: “Che tu podis vê simpri devant dut il mâl che tu âs fat!”, mi à sunsurât gno fradi, cjalantmi dret.
Cumò, ogni volte che o sint brutis peraulis, ogni volte che o viôt un compuartament violent, i miei voi a deventin plui neris e plui grancj, la mê piêl plui grispiose e plui secje.
Gno fradi nol è plui di trê setemanis. No si sin mai plui fevelâts dopo che mi à acusât di vê fât murî la mame cu lis mês peraulis cence amôr, cu la mê assence ma soredut cui miei debits di ripaiâ. La ipoteche su la cjase dai miei no le ai migo metude jo, eh, e figuraitsi se la volevi. Ma tal moment dal faliment nol jere nissun che al podes judâmi cuntun franc in plui. La cjase dai miei le à ipotecade la bancje e jo soi scjampât vie aes Maldivis. Fasint murî la mame.
No le ai fate murî jo. E gno fradi, che al è muart bessôl, sa lu meretave.
No lu cjali nancje, il spieli, ma o sai che se lu fases o podarès inneâ tal scûr fosc dai miei voi.
La mame e veve voi celescj clârs, la voglade dispès un pôc avilide contornade des sôs bielis grispis. Jo o ai une voglade rabiose e cence font, plene di dut il mâl che o viôt e o sint dulintor, ma no ai ancjemò capît pardabon ce che o ai fat di mâl. Forsit no lu capissarai mai e o murarai ancje jo cussì, ‘tun scûr infinît cence misericordie, bessôl e scunît, cul ricuart di chescj voi che no son plui i miei.
– – – – – –
Plinio al resonave a bocje sierade, cjalant in bas, intant che dal barcon al jentrave il celest legri di une zornade di soreli.

di Margarite Cogôi (Glorious Grene)
#1794

Notis: opare di Ugo Canci Magnano (Raccoglitore di caffè)

1 comment