CC24Novembar#06 – Une stele distudade

#06 – Une stele distudade

Di trop brâf che al jere Tomâs si jerin acuarts ducj ae prime prove di balet.
Discolç, cui pîts luncs e cun la prese sigure sul palc de sene, al saltave cuntune lizerece che nuie e veve a ce fâ cun chê des frutinis.
Concentrât fin te anime dal sudôr sglonf di passion, al lassave jentrâ le musiche in tes venis, il ritmi intai vues e si bandonave al so grim.
Al jere felicitât in svol.

Sô mari lu rimirave come se lu viodès pe prime volte, cun braùre, ma ancje cun maluserie.
Je lu cognosseve ben chel frutin di siet agns, che nol zuiave cui tratôrs ni cun lis pistolis, ma al balave dapardut sintint il Lât dai Cigns di Cajkovskij.
I muscui si ingropavin e al deventave pavee.

Ae seconde prove, Tomâs al jere l’unic pont di celest jenfri tant colôr di rose.
Ancje chês altris maris e vevin capît che al podeve deventâ un gnûf Bolle e, tra di lôr, si cisicavin «Al è propit puartât pal bal classic. Di sigûr al deventarà famôs».

Dome sô mari e taseve e e niçave il cjâf.
«No crôt che so pari lu lassarà tornâ a bal. Lu viôt bielzà campion di balon» i disè ae mestre.

«Lu convinçarai jo» i rispuindè, jê.
Ven a stâi che lu veve invidât a vignî a viodi so fi, ma la rispueste e jere stade crude e sclete: «Nol a timp di fâ faliscjis, lui. Il cjamp di balon al à di jessi il so puest. Nol è mighe di chê altre spuinde gno fi».

Ae tierce prove di balet, Tomâs no si jere presentât.
E nancje sô mari.
Une stele nancje nade si jere bielzà distudade.
O, forsit, e stave dome in spiete dal coraç di fâ faliscjis!

di Pierina Gallina
#1801

1 comment