La epidemie di zombi a Nadâl – part II

L’orôr discjadenât a Pordenon al veve fat scjas, ma za cualchi mês daspò dal principi de epidemie di zombi cualchidun a veve vût une cjatade scaltre e scomençât a inmaneâ i “Naonian Christmas Zombie Tour”, cu la solite borghesie ae ricercje di emozions e disponibile a paiâ salât. Il marcjât di porcariis nadalinis al jere za scomençât di un toc: un braç di zombi 80 euros, deperibilitât svelte, un braç di turist che nol è rivât a cori avonde 500 euros, deperibilitât un tic mancul svelte, une orele 45, e vie indenant. L’articul che al lave di plui a jerin i cjâfs cuntun cjapielut di Nadâl. Aromai, no i interessave plui a nissun de peule di Pordenon, ma dome di sfrutâle par fâ bêçs: a la fin fin, disgraciis e ombrenis a son plui lizeris di puartâ ator cuant che a son di chei altris.
I sorevivûts, i Potterpunks, a vevin tolerât la situazion par un biel pieç, parcè che e jere vignude fûr une sorte di micro-economie: a vignivin paiâts in robis di mangjâ e in imprescj aromai disparîts in cambi di cualchi fotografie. Ma intun pâr di agns e je vignude fûr une fazion contrarie: cui safari zombi a jerin aumentâts ancje, par l’apont, i zombi, par vie che cualchi furbon dai tour che si jere metût dacuardi cu la mafie par vê simpri gnûf materiâl organic. Il grup al jere rivât a cjapâ il podê e, intun revoc di sanc e berlant formulis cence sens tant che “Ustiment ustimentorum” e “Wingardium Leviosa”, a fâ un maçalizi di turiscj, discjadenant però la furie de mafie, che subite e veve mandât i siei tirepîts.
Ma un altri pericul a si stave fasint dongje: il vin cuinçât, butât a litris tes stradis al à causât stranis mutazions gjenetichis tes pantianis, che a scomencin a ingruessâsi fûr di misure…

di Alessio Ecoretti
#1769

Note: par lei la part I:  La epidemie di Nadâl a Pordenon

1 comment