CC24Setembar#26 – Une dì cence durmî

#26 – Une dì cence durmî

Une pontade mi sveà a buinore, aes sîs.
Il gno cuarp al scomençave a vê mudaments… al jere chel di. O savevi che o scugnivi spietâ e che nol jere il timp par puartâmi in ospedâl, ma l`ingôs al jere il gno nemì, no podevi spietâ ancje se al mancjave un pôc di timp.
Ogni ore o scomençai a sintî une stiletade ogni volte un pôc plui fuarte e plui fuarte. Cuant che ae fin lis sintivi ogni cinc minûts e cun plui fuarce o lerin vie al ospedâl.
Ducj mi cjalavin cun cortesie e a forin cetant zentîi, ancje se nol jere ancjemò il timp. Siet di dilatazion mi disè la ostetriche, mancul des oris che ti coventin par viodi to fi e jo o sintivi  che ogni muscul de vagjine si slargjave par parturî. Al jere misdì, o cjaminavi e cjaminavi par dute la cjamare e ogni volte mi someave plui piçule, plui strente, no volevi jessi li, o volevi jessi intun altri puest.
O fasevi moviments di bal, o lavi sù e lavi jù o fasevi cualsisei robe par podê sveltî dut il procès, ma mi mancjave un pôc di plui, vot di dilatazion, ah ah ah, no podevi sta cence movimi, cence respirâ in maniere agjitade. Lis gotis di sudôr a colavin su la muse tant che o fos intune maratone. Lis oris si slargjavin tant che diis e setemanis, a jerin ae sîs prime di sere e no podevi jessi, no ai plui fuarcis par continuâ, o scugnivi polsâ ma ancje lâ fûr di chel lûc. Il frut al vignive di culate mi disè la ostetriche, al è un pôc complicât ma no impussibil. O sintivi che il cur si sveltive a fuart, o sintivi come se dut al sburtàs, il dolôr al jere come mil cuvîi che a mi sburtavin, a mi sbregavin, il cûr al jere daûr a cori. Ma o jerin li, al jere un sfuarç di grup, o lu ai dit cence cognossilu, o jeri vignût a cambiâ il mont, a voltâlu ae volte, in ogni câs, o ai fevelât cun lui, cul plui grant amôr pussibil par che al mi judassi a sburtâ tant che o podevi, che o jeri daûr a fâ la mê part, o jerin ducj i doi in chest e di chê dì indenant al sarès stât simpri cussì.
E a jerin lis sîs di matine, dopo vê respirât e sburtât, sburtât e respirât, un agnul maraveôs al vignì in chest mont. In chel moment no lu savevi, ma al sarès stât l’amôr de mê vite, de mê anime e de mê fuarce. Une zornade interie cence siun e valeve la pene, e jere la robe plui biele che o vevi creât in dute la mê esistence.

di Cecilia Liva (La Ciachegna)
#1768

3 comments