CC24Setembar#25 – La frontiere dai sigûrs

#25 – La frontiere dai sigûrs

Tal paisut di Molin Sierât ducj a jerin baricâts in cjase. Al ploveve di cussì tancj dîs che ancje lis bestiis si jerin ingrumadis intune grote par parâsi.
Di colp, vie pe gnot, un slac trement al jere vignût jù de montagne lassant il paîs isolât insom de valade. La uniche strade e jere interote di un straplomp insuperabil, un sdrup che ju taiave fûr dal mont.
A vevin spietât par dîs i socors, ma dai paîs de valade ur vevin mandât un messaç disint di spietâ la fin dal Unvier. No si podeve riscjâ la vite par socori cuatri montanârs ignorants.
Cussì, no si sa ben se par orgoi o par svindic, a vevin decidût di restâ lassù. Da rest nol jere dificil sorevivi in mont, par int che e jere za usade a contentâsi di pôc. Fasûi e patatis, scuete e formadi no saressin mancjâts se ducj si davin une man. Il consei des fameis al veve votât e ducj a jerin dacuardi.
Si jerin strenzûts intor de mont come intor di une mari suturne che però ju tignive in vite. Par lôr il precipizi nol jere plui une disgracie ma une fortune. Là sù si viveve in mût vêr e autentic, si capive ce che e jere pardabon la essence de vite.
Cualchidun al riferive di vê sintût alc tai prâts plui adalt, come une presince che lu spiave di daûr dai arbui. E cualchi gnot tal aiar di tampieste si sintive come une vôs di femine, un cjant o un lament, che al vignive dal confin plui fis dal bosc. Ma nissun al rivave a viodi chês presincis antighis.
A passavin i agns, fats di nêf e di soreli, di faturis e di fiestis. Fruts a nassevin, vielis a murivin. I zovins si domandavin se e fos stade juste la decision cjapade dai paris tancj agns prime. Cumò a jerin tal consei des fameis e al tocjave a lôr decidi il destin di Molin Sierât: vevino di restâ lassù a custodî i segrets des montagnis, o vevino di cirî un contat cul mont difûr?
Cheste conte no à un finâl, parcè che là che e je une frontiere, di dutis dôs lis bandis i oms a son sigûrs di vivi la miôr vite pussibil. Ma voaltris, cuale sielzaressiso?

di Stralunade (Muspilli)
#1767

1 comment