CC24Otubar#10 – Otober

#10 – Otober

Jo i soi il sunadôr e il strument, i soi il musicist e le musiche stesse: lis notis corin dilunc de mê spine dorsâl, lis notis son le mê spine dorsâl. I no soi biel come nol è simpri biel il varîa dai umôrs che i doni, tant blues che soreli, e i soi monotono come il battit dal cûr, tu-tum, tu-tum, un metronomo incostant e solitari, pessim par tignî un cualsisedi groove, come une band di provincie che si inçopede dulà che chei altris i marcin.
Jo i soi il sunadôr e le musiche, lis notis e lis ignotis, un rai sore di un pentagram che al è tele e preson, dulà che i vîf e i rît, dulà che i prosperi e mi disperi, e i svuali cence cresci. I flâts son il gno flât, i tambûrs mi fasin di pas e i tendins come bas profonts in costant tension in moviment costant dentri il marimont.
Jo i soi il sunadôr e lis peravolis, chês che i scrîf, chês che i no dîs, un lengaç crût e insiemit forbît, di vuêts e di silenzis, un contrappunto ed un disappunto insiemit. I monti e dismonti scjalis intant che i monti e smonti sù par scjalis ator pal mont, cuant che i vares voie di restâ ma tu ti mi dîs tra pôc al rive il gno omp, tu âs veramentri di lâ, amôr.
Jo i soi il sunadôr, e intraten tant che i stufi, e i mi stuarzi su me stes, e i mi strici, e lasci che il cjâlt dal gno cûr al jessi dai miei polmons e al jempli il mont e il futûr.

di Nevio
#1779

Note: opare di Mirko Basaldella (Motivo terrestre 1948)