CC24Otubar#09 – Colôrs saturâts

#09 – Colôrs saturâts

Toni, voltiti, daûr di nô, al è tornât!
Mi caghi su sô mari, Meni… anìn a platâsi te buse li, o sarìn in salf, al è scûr, gjave vie chê tô code zale fluoressent che si viodarà de scoiere tant che un semafar, su.
O sin salfs cumò, dulà isal?
Al è passât dilunc vie, no lu viôt plui.
Toc di mierde! Mi a fât cagâ la anime!
Tu tu ti caghis dapardut, Meni, tu âs di sbassâ un cambi: une dì tu mi murirâs di un colp invezit di jessi mangjât di un cjân di mâr.
Cjân di mâr lis balis Toni!: chest al è un cjân di mierde!
Dîspo, âstu notât alc di strani te sô ande?
Strani?, lassant di bande la sô magle blancje sore, no ai viodût nuie di strani.
Al somee une vore cuiet il maladet… tant che se nol ves vude nissune voie di mangjânus! Non sai cemût dîlu; al somee calm, disinteressât, distant.
Al è cussì che ti cjapin, Meni… cun la lôr ande distante ti fasin sintî sigûr e zas!: intun lamp ti mangjin tant che une caramele.
No, al è alc di strani: o ai viodût une vore di chescj maladets te mê vite, Toni, e chest nol è un scuâl normâl.
Ohibò!: scoltìn al espert di scuâi!… secont te: cuâl isal il compuartament di un cjân di mâr normâl?
No stâ a cjapâmi par un dordul, Toni, un cjân di mâr vêr al è plui veloç, plui gnervôs, stant che la vite e je une vore curte par jessi calm; chest chi invezit al somee pene saltât fûr di une lezion di yoga… une biele lezion: une di chês che il OM al è stât plui fuart di simpri.
Cumò o sintìn al guru: cuâl isal il to non? Guru Meni? Guru Pes?…
No stâ a fâmi ridi, che lis bufulis a son plui lungjis e il maledet al pues viodilis miôr…

Dal dut indiferent a chestis cjacaris picininis il grant scuâl blanc e neri, al nade in mut maestôs tal spazi limpi, legri e plen di colôrs saturâts in ricercje di alighis e jerbe di mâr: al à une rare cundizion gjenetiche che lu à fât deventât erbivar.

di Vercingetorix
#1778

Teme: Gaetano Klaus Bodanza (idropitture)