CC24Otubar#08 – Spieli

#08 – Spieli

Regjie sino pronts? Anìn! “Bundì a ducj, soi Doriano, graciononis di cheste ospitalitât, us presenti me stes, creât di biade mê mari, par fâus gjoldi de mê presince, de mê batule , des mês cjatadis  e tendencjis, e che in gracie de IA  mi jude a elaborâ ogni vuestri desideri. Benedets voaltris opulents e maraveôs siorons, che a mostrin al populin lis robis plui mostruosis su cemût spindi, spandi, mortificâ sui social il rest dal mont normâl che al sorevîf. Soi chi par vendius lis vuestris bramis. Striche a striche, centesim a centesim; taiadis a pinel su la imagjin che o volês spielâsi. Visaitsi, o seis imagjins tal eter, pulcinei de veretât, atôrs de bausie ma sglonfs di Like.” Finît par vuê. Mi gjavi de piel ducj i eletrotrasmetidôrs. Us conti,.soi singul, crodint ma no catolic, raventii lidric ma o mangji ramen, porconi ma o fâs la comunion e mi pain par fa fâ ce che vuei jo. Plui vueits a son, plui o gjolt a fruçâi chei beneficis che lôr a àn vût cence savê ce valôr che vevin. O ai fam cumò, tal gno cubo di cjase, o parchegji il me “alterego” e o  slargji une tavuae colôr dal mâr, tiri dongje une terine di vanzums, e dôs pomis che gno barbe, benedet, mi fâs cjatâ sui scjalins di scuindon e un tai dal so clinto. O alci i voi sul cuadri che îr o ai piçjiât su la parêt di front. Un regâl di un ciert Fred Pitin, aromai veli, cognossût in trasmission. Garbât, inteligjent, mi spiegave i zûcs di colôrs de lûs, che a mudin la viste e la vite. Nol è il gno câs: jo soi la lûs e il scûr par mê e par chei altris. Mi scjasse però dentivie chel silenzii e semplicitât de piture. O inforcji une pironade, torni a dâi un voli. Calme mi cjale, spieli dal mê desinâ, e mi pâr sintî sunsurâ une vôs: “Fantat, je la lûs che a jemple la taule e se ancje il desc al somêe muart, al à dut ce che al sierf par vivi. Bisugne cjalâ ai particolârs, alore l’insiemi al cjape sens. Spieliti e domanditi: sêstu vîf o cjar fraide? Tu scrutinis la mê aparente staticitât, une tele mute ti pâr. Ten cont invezit di  tropis animis che a si son messedadis tai agns daûr des arts, de piture, de musiche, dal teatri par smovi culture, cressite umane, cognossince, pâs e benvolêsi. Rispuinditi alore: sêstu plui muart tu o Jo? Timp o tart ogni robe e sarà clare, e ognidun di nô al larâ a mulin cu la sô farine. Di cualchidun al restarà il ricuart, ma tancj altris e saran dome pulvin tal eter.

di Stiefin Asquini (Siruc)
#1777

Teme: Fred Pittino, nature muarte

2 comments