CC24Otubar#04 – Americhe

#04 – Americhe

Il pignarûl al continuave a brusâ. Nol contignive balis di stran. I barbons lu vevin metût adun tirant dongje dutis lis robis che a vevin di jessi eliminadis: libris (ducj inutii, al bastave un libri sôl, chel Sant), gjornâi, CD, discs di vinîl, DVD pornografics, vecjos catalics dal Postal Market, manifescj di CALZEDONIA, zugatui, sculturis di len e cuadris, tancj cuadris.
Il fum si alçave, neri e puçolent, su la vile e ducj i cjâfs di famee, cui lôr fîs mascjos dongje, a assistevin complasûts al rît. No tu viodevis une femine ator. A jerin dutis sieradis in cjase, batudis une dì sì e une dì no se dome a provavin a vierzi il bec.
Pôc lontan dal pignarûl e jere une grue. Parsore al jere picjât un om zovin, sui vincj agns. La sô “colpe”? Di jessi stât un culatin.
Il notabil plui notabil de vile, Al-Houdini, cussì si clamave, al riduçave a viodi chel cadavar pindulâ. Za i stevin rivant dongje lis çoris a becotâlu.
Ta chel al rivà Al-Lawarhjani, un tiput sclagn e piçul, ledrôs e scalembri, cu la barbe grise. Al veve intor une lungje tuniche cragnose di ont e tal cjâf un turbant parimentri sporc. Al jere, lui funzionari de “polizie moral”, content dal so botin: lant a recuisî ogjets proibîts intune cjase privade al veve cjatât chel ultin cuadri.
Al-Houdini, cjalant la opare, al drindulave il cjâf, come a disi che a jerin robis di mats dome a pensâ di vê realizât une robe dal gjenar: a part il fat di piturâ figuris umanis e animâls che al jere “haram”, proibît, ma olsâ a meti inte sene il profete Yeoshua? E zontâ Nembo Kid e doi bambi? Chel al jere masse!
No, no! Vie daurman intal fûc!
La opare si sfulminà in cualchi istant, ultin vanzum dal mont vanitôs che al jere prime.
Cussì a levin lis robis tal Emirât di Al-Fryyul.

di Milio dai cjans (Vercingetorix)
#1773

Teme: opare di Gaetano Klaus Bodanza

1 comment