CC24Setembar#23 – Sul puint di Braulins al è passât un casin

#23 – Sul puint di Braulins al è passât un casin

Aromai l’esercit al comant dal GLC (Grup di Liberazion de Cjargne) al à concuistât i avanzâts di Dalès e di Avasinis. Lassade su la destre la pissande “La spissula”, cu lis musis sporcjis cjareçadis de frescure che e rivave di chel salt di aghe, ultime vision di incjant de lôr tiere, si sburtin viers la “Zone 1”. I numars ju vevin dâts a areis difarentis, a seconde de impuartance strategjiche: il 5 pe zonis di facile prese, l’1 pe uniche zone che e varès fat la difarence jenfri la vitorie (e la sconfite sigure dal nemì) e la distruzion cu la pierdite di buine part dal propri teritori. La Cjargne e je la Cjargne e nissun al à di permetisi di tocjâle, se no i cjargnei si incazin e no lassin cori nuie. Il GLC, alore, si sburte viers la “Zone 1”: il puint di Braulins. Rivâts a ôr dal puint, il Comandant Cortolezzis al alce un braç e ducj, a chel segnâl convignût, si fermin di bot. Di chê altre bande dal passaç sul Tiliment al sta, cui voi spalancâts e il braç alçât compagn, il Comandant Copetti, a capitanâ il CEB (Commando de Espansion de Basse). I doi si cjalin e, cence che nissun al fasi câs, si cimiin. No si à di pensâ ch’al sedi un segn di intese. Dut altri. I doi si cognossin fin dai agns des Superiôrs. A jerin in classe insiemi al Malignani, 5a EDI A an di scuele 2000/2001. E cuant ch’a rivavin lis zornadis di autogjestion i doi a vevin concuardât che par fâ partî il casin des barufis e dal vandalisim distrutîf al bastave chel piçul segn: une cimiade. E cussì ducj doi a sbassin il braç cu la palme de man voltade viers il bas, biel planc. I soldâts, chei dal GLC, cussì come chei dal CEB, e metin ju i fusîi. Al passe il timp di un bati dal cûr e a partissin. Il teritori de Cjargne nol vignarà sporcjât cul plomp, ma al sarà vint cul sanc… e dome cu lis mans.

di Alessandro Valoppi (Daûr la Lavagne)
#1765

1 comment