CC24Setembar#22 – Faliscjis

#22 – Faliscjis

Il sfuei di cjarte al trindule sot dal calôr de flame che si imparone des peraulis inneadis ta chel mâr bîs. Ogni dì lis stessis, a berlâ di vueris, copariis, tristeriis. Betine e dîs simpri che almancul li dentri a puedin spurgâ dute la lôr maluserie. Betine. Lu à simpri impiât jê, il fûc di cjase. Par vie che Michêl a buinore al veve di spesseâ, rivâ in ufici adore, par dopo jessi un dai ultins a lâ vie. Dal rest, lu paiavin ben par chel lavôr che no i displaseve nancje. Mai compagn, cun chel drandran di cjartis e clamadis che dispès a menavin dongje rognis. Jê e stave cjase, a spietâlu, pronte a parâi vie dute la strache cuntune strente e un goloset fat cu lis sôs mans. E veve molât il lavôr cuasi subit, prime par vie dal frut, po parcè che i bêçs di lui a jerin plui che vonde par stâ contents in trê, ancje in cuatri o cinc, se e fos stade la ocasion. Ma la ocasion no jere vignude e Massimo si usà in curt a jessi l’unic fi di chê famee. Un bon fantat, Massimo. Intal cressi, si dimostrà de stesse paste di Michêl, simpri prin, simpri pront, simpri il miôr, cence mai però dâ la impression di un sbreghemontagnis. Clare che la strade par lui e jere za segnade, e in pôc timp si cjatà a viazâ pal mont tant che agjent di une multinazionâl.
Lât in pension Michêl, a varessin podût biadelore gjoldisi il lôr timp insiemi. Iscrivisi a un cors di bal, visitâ paîs che jê e veve viodût dome in television, passâ la zornade a lei un libri.
Invezit Betine si jere inmalade. Cuasi dibot. Lis tarlupulis, i mancjaments, lis pachis dapardut. I miedis a provarin dutis lis curis, ma nie ce fâ. La ultime sere, cuntune espression un tic spierdude, jê i disè che no varès mai volût fâi pierdi cussì tant timp, ma che e jere contente di vêlu dongje, infin.
La flame e trindule biel che il fûc al sclope di gjonde intal spolert. Cualchi faliscje si jeve des boris, ardide. Po, si poie lizere su la man di Michêl, aromai cinise.

di Fuguline (Teresine la çuete)
#1764

3 comments