CC24Setembar#21 – Una zornade di soreli

#21 – Une zornade di soreli

Daspò di une schirie di zornadis di ploie, al è rivât il soreli.
Cuntun at che al à dal rivoluzionari o cjapi sù la biciclete. Saran stâts mês che no le tocjavi.
Mi invii daûr di cjase par stradutis di braide e trois. L’asfalt lu cjati dome cuant che o scuen traviersâ il stradon, passant vie di presse come se mi corès daûr cualchidun.
No pues fâ di mancul di fermâmi cuant che o jentri dentri du un boscut fat di arbui che ancje in chest atom si son vistûts de fieste cun vistîts di masse colôrs. No soi plui usât a tant sflandôr!
Mi plasarès savêmi invelegnât e plui rabiôs, ma vuê o stoi ben!
Pedalant dilunc cjamps di jerbe secje e lant a ôr di vecjos pomârs lassâts al lôr destin, o rivi juste tal puest che o vevi voie di rivâ: chê poce di aghe verduline che ducj a clamavin “il lât”, nancje che al fos chel di Cjavaç…
Poiade la bici intor di un morâr, mi rint cont dal scjarsissim livel di probabilitâts che al è stât il no scuintrâ nissun par dut il tragjit. Cun spirt plui lizêr mi senti tal ricès di un vencjâr e mi inçussìs a cjalâ il movisi trancuil de aghe sburtade, tal cidinôr dut ator, di une bave di ajar.
Al à dal impussibil… in chest 2025, juste un secul di chel vecjo, il gnûf regjim apene lât su al ten ducj di voli e no i stice masse che tu ti movis ator cence une clare e ben ricognossibile destinazion. Al è un moviment suspiet chel di lâ a passon zornant.
Ma vuê mi pàs da pâs, dal soreli e dal bon timp.
E no lu sint se cualchidun a mi vûl mâl.
Doman o tornarai a scombati.

di ?
#1763