CC24Setembar#17 – Falalela

#17 – Falalela

No sai ce che mi sturnìs, se la gnot, il scûr o la fumate. O il cidinôr.
Di bot la polse si sfante vie. Une musiche in lontanance che e cres. Un ritmâ svelt di colps o forsit bastons. Ma ancje un sun di mans che a batin su piels tiradis a fuarce. Mi ven di pontâ il dêt viers chês lusutis che cumò si pandin te scuretât. Lusignis che si vongolin e che planc si svicinin.
In curt mi ricrei e o cjali miôr. Une schirie di feminis mi zire ator. Mi sbelein, si berdein intor di me, fasint svoletâ chei cuatri peçots che a àn intor. La prime, la plui francje, mi ven dongje cuasi a lenzimi un smursiel. Mi rît. Mi coione. Intant la trupe e zuie cui braçs, cjantant une strane melodie.
— Jo ti cognòs! — O dîs intun sunsûr. — Tu sês Marie. Ancje mascarade di nuvice no tu puedis scjampâmi de memorie. Ve che a rivin i tiei compagns, chei omenats che tu âs inmagât cun la tô vôs di strie.
Mi mancje il flât. Mi ven di sbregâ la cjamese che mi oblee. Mi inacuarç invezit che o ai une gabane nere, tacolade, fruiade sui ôrs.
— Mi vêso vistût di plevan? Malandrets! No stait a tocjâmi, sporcacjons! O visarai il gno sorestant. Massepassûts!
Mi somee di colâ. No sint plui i braçs. Cumò mi tirin sù par aiar, mi pendolin, mi niçùlin, simpri plui svelts, fintremai che o svoli. Mi àn butât te aghe. O voi sot e o torni subit sù. Mi sint fate di len e mi rodoli tal roiuç, intant che dute la bande e vose: Ploie! Ploie! Ploie!
Cualchidun mi scjasse. O vierç i voi e o viôt Cristina che mi cjale, ridint di gust.
— Tu ti sês impisulît, Stiefin! Tu ti stevis insumiant.
Mi tiri sù in senton, pacjant e regolantmi il grisôr dai cjavei. Mi cjali ator. Il cjapiel di Loris al è pardabon brut. Me fradi Sandro al gjolt sot la barbe blancje. Flavio al fâs fature a stâ seri. Al rive me fi e mi slungje la cjarte des cjançons.
— Âstu pensât al toc pal bis, papà? — Mi dîs, cun chê cjavelade, cheste volte piturade di blu.
O cjol la pene e o scrîf cence dubi: Scjarazzule Marazzule.
Intant di fûr la int nus clame pal conciert.

di Massim Furlan (Brene Sfolmenade)
#1759

3 comments