CC24Setembar#16 – Bad Trip

#16 – Bad trip

Le prime volte che mi àn fate le propueste o soi restât incantesemât. “Ti fasarìn fa un “trip” come che no tu lu âs mai fat in vite tô”, mi veve sunsurât lui, bulo e babio come pôcs. O almancul, un ben cognossût in tal zîr. Un navigât. E je vere: come che si use a disi in chestis ocasions: “Me soi volude, le ai cirude e ancje cjatade”. La prudence e varès di jessi simpri tignude in sacrisante considerazion, ma aromai le fertaie e je fate e no si torne indaûr. Naturalmentri o vevi di nasâle fin dal principi, e cuant che o dîs “nasâle” o intint che nol coventave nancje un nâs perfet, par inacuarzisi che e jere propite robe buine: perifarie profonde di Udin. Lontan da lis vetrinis, dal lusôr che al compagne simpri la biele int. Un lûc isolât. Cognossût cul passeperaule. Duncje perfet. E il puest dut un program: une struture sfondrade, decrepite, cuasi platade daûr da lis cisis di un marcjepît. Dentri: une faune di manuâl! Int che si viodeve cjapade di chê fiere dal zûc che ti consume, e che simpri e je le anticjamare di dut ce che al ven daûr. “Cui ti mandial?” mi domande l’omenat che si capis daurman jessi il paron de barache. Al bastarà il non par garantîmi il bonacet. “Alore tu sês dal puest just” al dîs, cuntune ghigne che e fâs pôre. “E jo il to “pusher”, par usgnot!” E al fâs segnâl di puartâ ce che mi jere stât imprometût: un “trip”, sì, ma di tripis. Compagnadis come seconde puartade di un bacalà inneât tal tocjio. Dopo? Bicarbonato di sodio, come che al fos Metadone!

di Angelo  Floramo (Torototele)
#1758

2 comments